സെക്രട്ടറിയേറ്റ് മുതല്‍ വില്ലേജ് തലം വരെ സേവനങ്ങള്‍ സ്മാര്‍ട്ടാക്കി ഓണ്‍ലൈനില്‍ ലഭ്യമാക്കാന്‍ സര്‍ക്കാരിന് സാധിച്ചതായി കായിക-ന്യൂനപക്ഷ വകുപ്പ് മന്ത്രി വി. അബ്ദുറഹ്‌മാന്‍ പറഞ്ഞു. ജനങ്ങളുടെ ആവശ്യങ്ങളും പ്രശ്‌നങ്ങളും കൃത്യമായി വിലയിരുത്താനും തീരുമാനമെടുക്കാനും സാധിച്ചെന്ന് മന്ത്രി പറഞ്ഞു. കളക്ടറേറ്റില്‍ ജില്ലാതല പട്ടയ മേളയില്‍ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. സെക്രട്ടറിയേറ്റ് മുതല്‍ താഴെ തലം വരെ ഫയല്‍ കെട്ടിക്കിടക്കുന്നത് ഒഴിവാക്കാന്‍ താലൂക്കു തല അദാലത്ത് നടത്തിയപ്പോള്‍ പ്രധാനമായും ഉയര്‍ന്നു വന്ന പ്രശ്‌നം പട്ടയം ലഭിക്കാത്തതായിരുന്നു. അതുകൊണ്ടാണ് പട്ടയ വിതരണം വേഗത്തിലാക്കാന്‍ സര്‍ക്കാര്‍ ശ്രമിച്ചത്.
എം.എല്‍.എമാരോട് മണ്ഡലങ്ങളിലെ പട്ടയം ലഭിക്കാത്തവരെ സംബന്ധിച്ച് വിവരങ്ങള്‍ ആരായുകയും നടപടി എടുക്കുകയും ചെയ്തു.വില്ലേജ്, താലൂക്ക് തലങ്ങളില്‍ അപേക്ഷ നല്‍കി കാത്തിരിക്കുന്ന അവസ്ഥ ഇല്ലാതാക്കി, എല്ലാം സ്മാര്‍ട്ട് ആക്കി ഓണ്‍ലൈനില്‍ ലഭ്യമാക്കാന്‍ സാധിച്ചു. കേരളത്തില്‍ പട്ടിണി കിടക്കുന്നവര്‍ ഇല്ലെന്ന് ഉറപ്പിക്കാന്‍ തദ്ദേശ സ്ഥാപനങ്ങള്‍ വഴി സാധിക്കുന്നു. പിന്നോക്കക്കാരായ 35നും 60നും ഇടയിലുള്ള സ്ത്രീകള്‍ക്ക് 1000 രൂപ നല്‍കുന്നതോടെ സര്‍വ മേഖലയിലും ക്ഷേമം കൊണ്ടുവരാന്‍ സാധിക്കുമെന്നും മന്ത്രി അവകാശപ്പെട്ടു.