പാരിസ്∙ പാരിസിലെ പ്രശസ്തമായ ലൂവ്ര് മ്യൂസിയത്തിൽ നടന്ന കവർച്ചയുമായി ബന്ധപ്പെട്ട് 5 പേരെക്കൂടി പോലീസ് അറസ്റ്റ് ചെയ്തു. ഇതോടെ സംഭവത്തിൽ പിടിയിലായവരുടെ എണ്ണം ഏഴായി.അറസ്റ്റിലായ അഞ്ചുപേരിൽ ഒരാൾ, മ്യൂസിയത്തിനകത്ത് കയറി രത്നങ്ങൾ മോഷ്ടിച്ച നാലംഗ സംഘത്തിലെ അംഗമാണ് എന്നാണ് കരുതുന്നത്.പാരീസിലും പരിസര മേഖലകളിലുമായി വ്യാഴാഴ്ച രാത്രി നടത്തിയ റെയ്ഡിലാണ് 5 പ്രതികളെ പിടികൂടിയതെന്ന് പബ്ലിക് പ്രൊസിക്യൂട്ടർ ലോ ബേക്കോ അറിയിച്ചു. ഇവരുടെ ഫോണുകളും എൻക്രിപ്റ്റ് ചെയ്ത സന്ദേശങ്ങളും പിടിച്ചെടുത്ത മറ്റു വസ്തുക്കളും പരിശോധിക്കുകയാണ്. പിടിയിലായ ഒരാളുടെ ഡിഎൻഎ പരിശോധനാഫലം, ക്രൈം സീനിൽനിന്ന് ലഭിച്ച തെളിവുകളുമായി ഒത്തുപോകുന്നുണ്ടെന്നും പ്രോസിക്യൂട്ടർ കൂട്ടിച്ചേർത്തു.

ഒക്ടോബർ 19നാണ് ലൂവ്ര് മ്യൂസിയത്തിൽ മോഷണം നടന്നത്. പട്ടാപ്പകൽ വെറും ഏഴ് മിനിറ്റുകൾക്കുള്ളിലാണ് അമൂല്യരത്നങ്ങൾ പതിപ്പിച്ച നെപ്പോളിയന്റെ കിരീടം കാണാതായത്. 88 മില്യൺ യൂറോ വിലമതിക്കുന്ന വസ്തുക്കളാണ് കളവ് പോയത്. മ്യൂസിയത്തിൻ്റെ തെക്കുകിഴക്കൻ ഭാഗത്ത് അറ്റകുറ്റപ്പണി നടക്കുന്നതിനിടെയാണ് മോഷണം നടന്നത്. മോഷ്ടാക്കൾ നിർത്തിയിട്ട ട്രക്കിൽ ഘടിപ്പിച്ച യന്ത്രഗോവണി ഉപയോഗിച്ച് ബാൽക്കണിയിൽ കയറി ജനാല തകർത്ത് അകത്തുകടന്നു. നെപ്പോളിയൻ ചക്രവർത്തിയുടേയും പത്നിയുടേയും ഉൾപ്പെടെ, ചരിത്രപ്രസിദ്ധവും അമൂല്യവുമായ ഫ്രഞ്ച് രാജകീയ രത്നങ്ങൾ സൂക്ഷിച്ചിരുന്ന അപ്പോളോ ഗാലറിയിൽ നിന്നാണ് ആഭരണങ്ങൾ മോഷ്ടിക്കപ്പെട്ടത്.