മുംബൈ: മഹാരാഷ്ട്രയിലെ സതാറയിൽ ലൈം​ഗിക പീഡനത്തിന് ഇരയായതിനെ തുടർന്ന് വനിത ഡോക്ടർ ആത്മഹത്യ ചെയ്തു. ജില്ലാ ആശുപത്രിയിലെ ഡോക്ടർ ആണ് എസ്ഐക്കെതിരെ കൈവെള്ളയിൽ ആത്മഹത്യ കുറിപ്പ് എഴുതിവെച്ച് ജീവനൊടുക്കിയത്. വ്യാഴാഴ്ച്ച രാത്രിയാണ് സംഭവം. ഗോപാൽ ബദ്നെ എന്ന എസ്ഐ തന്നെ നിരന്തരം ശാരീരികമായും മാനസികമായും പീഡിപ്പിച്ചുവെന്നാണ് ഡോകടർ കുറിപ്പിൽ പറയുന്നത്. ഇയാളെന്നെ നാല് തവണ ബലാത്സംഗം ചെയ്തു.

പോലീസ് ഓഫീസർ ഗോപാൽ ബദ്നെ ആണ് തന്റെ മരണത്തിന് കാരണം. അഞ്ചുമാസത്തിലേറെയായി എസ് ഐ തന്നെ ശാരീരികവും മാനസികവും ആയി ആക്രമത്തിന് ഇരയാക്കുകയാണെന്നും വനിതാ ഡോക്ടർ മരിക്കുന്നതിനു മുമ്പായി തന്റെ കൈവെള്ളയിൽ എഴുതി. മുംബൈയിലെ ഫൽതാൻ ഉപജില്ലാ ആശുപത്രിയിലെ മെഡിക്കൽ ഓഫീസറായിരുന്ന വനിതാ ഡോക്ടർ ജീവനൊടുക്കുന്നതിനു മുൻപ്, ജൂൺ 19-ന് രണ്ട് പോലീസ് ഉദ്യോഗസ്ഥർക്കെതിരെ ഡിഎസ്പിക്ക് പരാതി നൽകിയിരുന്നു. തന്നെ നിരന്തരം ഉപദ്രവിക്കുന്നുവെന്നും ഇവർക്കെതിരെ നിയമനടപടി വേണമെന്നുമായിരുന്നു പരാതിയിലെ ആവശ്യം.