തിരുവനന്തപുരം: ശബരിമലയിലെ സ്വർണമല്ല രാജ്യത്തെ ഏറ്റവും വലിയ പ്രശ്നം എന്ന് എസ്എൻഡിപി ജനറൽ സെക്രട്ടറി വെള്ളാപ്പള്ളി നടേശൻ. സാധാരണക്കാരുടെ നീറുന്ന പ്രശ്നങ്ങൾ വേറെയും ഉണ്ടെന്നും രാഷ്ട്രീയക്കാർ അതൊന്നും കാണുന്നില്ല, ശബരിമലയെ തിരഞ്ഞെടുപ്പിനുള്ള വോട്ട് ആക്കി മാറ്റാനുള്ള അടവാണ് ഇതെന്നും വെള്ളാപ്പള്ളി വിമർശിച്ചു. ഇക്കാര്യത്തിൽ സർക്കാരിനെ തിരിച്ചുവിടുന്നത് എന്തിനാണ്. ഇതിന്റെ പേരിൽ ദേവസ്വം മന്ത്രി രാജി വയ്ക്കണമെന്ന പ്രതിപക്ഷത്തിന്റെ ആവശ്യം തികച്ചും രാഷ്ട്രീയമാണ്. ഉപ്പ് തിന്നവൻ വെള്ളം കുടിക്കട്ടെ എന്നും, സകല ദേവസ്വം ബോർഡുകളും പിരിച്ചുവിടണമെന്നും വെള്ളാപ്പള്ളി നടേശൻ പറഞ്ഞു.

കടപ്പുറത്ത് പോയി കാള കുത്തിയതിന് വീട്ടിൽ വന്ന് അമ്മയെ തല്ലരുത്. കോടതിയെല്ലാം കണ്ടുപിടിച്ചോളും. പുണ്യാളന്മാർ ഒക്കെ പാപികളാണെന്ന് തെളിയട്ടെ. വാസവൻ നല്ല മന്ത്രി എന്നും വെള്ളാപ്പള്ളി വ്യക്തമാക്കി. മന്ത്രി വാസവൻ മൂന്നു വകുപ്പുകളും നല്ലപോലെ കൈകാര്യം ചെയ്യുന്നുണ്ട്. അഴിമതി ഇല്ലാത്ത മന്ത്രിയാണ് അദ്ദേഹം എന്നും പുകഴ്ത്തൽ. പ്രതിപക്ഷത്തിന് വേറെ പണിയൊന്നുമില്ല. വെറുതെ കിടന്നു നിലവിളിക്കുകയാണ് വിഡി സതീശൻ. പ്രതിപക്ഷ നേതാവിന്റെ കൂടെ ഇപ്പോ ആരുമില്ലാത്ത അവസ്ഥയാണെന്നും വെള്ളാപ്പള്ളി പരിഹസിച്ചു. കേന്ദ്രത്തിന്റെ പദ്ധതിയാണ് പി എം ശ്രീ പദ്ധതി. കാലത്തിനനുസരിച്ച് മാറണം. ദേശീയ വിദ്യാഭ്യാസ നയത്തിൽ നിന്ന് കേരളം എന്തിനു മാറിനിൽക്കണമെന്നും അദ്ദേഹം ചോദിച്ചു.