കൊല്ലം: കൊല്ലം കൊട്ടാരക്കരയിൽ ആനക്കൊമ്പിൽ തീർത്ത ദണ്ഡ് വിൽക്കാൻ ശ്രമിച്ച രണ്ടുപേരെ അഞ്ചൽ റേഞ്ച് വനപാലകർ പിടികൂടി. കൊട്ടാരക്കര സ്വദേശിയായ സുബു, വെളിയം സ്വദേശി അരുൺ എന്നിവരാണ് പിടിയിലായത്. രഹസ്യ വിവരത്തെത്തുടർന്ന് കൊട്ടാരക്കര ഗണപതി ക്ഷേത്രത്തിൻ്റെ പാർക്കിംഗ് ഗ്രൗണ്ടിൽ നടത്തിയ പരിശോധനയിലാണ് ഇവർ പിടിയിലായത്.

സംഘത്തിലെ കൂടുതൽ പേർക്കായി അന്വേഷണം വ്യാപിപ്പിച്ചു. ഇടനിലക്കാർ, ദണ്ഡ് വാങ്ങാനെത്തിയവർ എന്നിവർ ഉൾപ്പെടെ കൂടുതൽ പ്രതികൾ പിടിയിലാകാനുണ്ട്. വനം വകുപ്പ് എത്തുന്നതറിഞ്ഞ് ചിലർ രക്ഷപ്പെട്ടതായി സംശയിക്കുന്നു. പിടിച്ചെടുത്ത ആനക്കൊമ്പ് സുബുവിന്റെ മുത്തച്ഛൻ ശ്രീലങ്കയിൽ നിന്ന് എത്തിച്ചതാണെന്നാണ് പ്രതികൾ മൊഴി നൽകിയിരിക്കുന്നത്. പ്രതികളുടെ മൊഴി പൂർണ്ണമായി വിശ്വസിച്ചിട്ടില്ലെന്നും അന്വേഷണം തുടരുകയാണെന്നും വനം വകുപ്പ് അറിയിച്ചു.