തിരുവനന്തപുരം: രാഷ്ട്രപതി ദ്രൗപതി മുർമു നാലുദിവസത്തെ സന്ദർശനത്തിനായി കേരളത്തിൽ എത്തി. വൈകിട്ട് 6.20 ഓടെയാണ് രാഷ്ട്രപതി തിരുവനന്തപുരം വിമാനത്താവളത്തിൽ എത്തിയത്. ഗവർണർ രാജേന്ദ്ര വിശ്വനാഥ് ആർലേക്കറും പത്നിയും, മുഖ്യമന്ത്രി പിണറായി വിജയൻ, കേന്ദ്രമന്ത്രി ജോർജ് കുര്യൻ, മേയർ ആര്യാ രാജേന്ദ്രൻ എന്നിവരാണ് രാഷ്ട്രപതിയെ സ്വീകരിച്ചത്. രാജ്ഭവനിൽ ആണ് ഇന്ന് രാഷ്ട്രപതി തങ്ങുക. ബുധനാഴ്ച രാവിലെ 9:35ന് തിരുവനന്തപുരം വിമാനത്താവളത്തിൽ നിന്നും രാഷ്ട്രപതി ഹെലികോപ്റ്ററിൽ നിലക്കലേക്ക് തിരിക്കും. 10.20 നിലയ്ക്കൽ എത്തുന്ന രാഷ്ട്രപതി അവിടെനിന്ന് റോഡ് മാർഗ്ഗമാണ് പമ്പയിൽ എത്തുക. ശേഷം ഗണപതി ക്ഷേത്രത്തിൽ നിന്ന് കെട്ട് നിറച്ച് സന്നിധാനത്തേക്ക് പുറപ്പെടും.

രാഷ്ട്രപതിയുടെ ശബരിമല സന്ദർശനത്തിനായി വലിയ സുരക്ഷാക്രമീകരണങ്ങളാണ് ഒരുക്കിയിരിക്കുന്നത്. 1500 പോലീസുകാരെയാണ് സുരക്ഷ ഡ്യൂട്ടിക്കായി സന്നിധാനത്തെ വിന്യസിക്കുക. 50 വയസ്സ് കഴിഞ്ഞ വനിതാ പോലീസുകാരെയും സന്നിധാനത്ത് സുരക്ഷയ്ക്കായി നിയോഗിച്ചിട്ടുണ്ട്. രാഷ്ട്രപതി സന്നിധാനത്ത് എത്തുമ്പോൾ പതിനെട്ടാം പടിക്ക് മേലെ തിരുമറ്റത്ത് 10 പേരെ മാത്രമേ അനുവദിക്കുകയുള്ളൂ. ഇതിൽ തന്ത്രി, മേൽശാന്തി, രണ്ട് പരികർമ്മികൾ ദേവസ്വം ബോർഡ് ഭാരവാഹികൾ മൂന്ന് ജീവനക്കാർ എന്നിങ്ങനെ മാത്രമാണ് ഉണ്ടാവുക.