കോഴിക്കോട്: ട്രെയിനിൽ നിന്ന് വലിച്ചെറിഞ്ഞ മദ്യക്കുപ്പി ദേഹത്ത് വീണ് കാൽനട യാത്രക്കാരന് പരിക്ക്. വൈകുന്നേരം കൊയിലാണ്ടി റെയിൽവേ സ്റ്റേഷൻ പരിസരത്തുവെച്ചാണ് സംഭവം. കോഴിക്കോട് നിന്ന് കണ്ണൂർ ഭാഗത്തേക്ക് പോവുകയായിരുന്ന തിരുവനന്തപുരം-പോർബന്തർ എക്സ്പ്രസ് ട്രെയിനിൽ നിന്നാണ് കുപ്പി പുറത്തേക്ക് വലിച്ചെറിഞ്ഞത്.
ട്രെയിൻ ഇറങ്ങി ട്രാക്കിന്റെ അരികിലൂടെ നടന്നുപോവുകയായിരുന്ന പേരാമ്പ്ര സ്വദേശി ആദിത്യനാണ് പരിക്കേറ്റത്. ആദിത്യന്റെ മുഖത്ത് മുറിവേൽക്കുകയും പല്ലുകൾക്ക് കേടുപാടുകൾ പറ്റുകയും ചെയ്തിട്ടുണ്ട്. ഇദ്ദേഹത്തെ സ്വകാര്യ ആശുപത്രിയിൽ പ്രവേശിപ്പിച്ചു.



