കണ്ണൂർ: കൂത്തുപറമ്പ് വയോധികയുടെ മാല പൊട്ടിച്ചോടി സംഭവത്തിൽ ഈസ്റ്റ് ലോക്കൽ കമ്മിറ്റി അംഗം രാജേഷ് പി പി യെ സിപിഐഎം പുറത്താക്കി. മാല മോഷണക്കേസിൽ അറസ്റ്റിലായതിനെ തുടർന്നാണ് നടപടി. കൂത്തുപറമ്പ് നഗരസഭയിലെ സിപിഐഎം നാലാം വാർഡ് കൗൺസിലറായിരുന്നു പി.പി രാജേഷ്. കഴിഞ്ഞ വ്യാഴാഴ്ചയാണ് വയോധികയുടെ സ്വർണമാല പൊട്ടിച്ചത്. 77 വയസുള്ള ജാനകി എന്ന വയോധികയുടെ മാലയാണ് ഇയാൾ കവർന്നത്.

ജാനകി വീട്ടിൽ തനിച്ചായിരുന്ന സമയത്തായിരുന്നു മോഷണം.അടുക്കളയിൽ ജോലി ചെയ്യുകയായിരുന്ന വയോധികയുടെ അടുത്തേക്ക് വീടിന്റെ മുൻവാതിൽ തുറന്ന് അകത്തുകയറിയ ഒരാൾ മാല പൊട്ടിച്ച് ഓടി രക്ഷപ്പെടുകയായിരുന്നു. മോഷ്ടാവ് ഹെൽമറ്റ് ധരിച്ചിരുന്നതായി ജാനകി പോലീസിന് നൽകിയ പരാതിയിൽ പറഞ്ഞിരുന്നു. മോഷ്ടാവ് ആരാണെന്ന് ആർക്കും തിരിച്ചറിയാൻ കഴിഞ്ഞിരുന്നില്ല.തുടർന്ന് സി.സി.ടി.വി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ മോഷ്ടാവ് സഞ്ചരിച്ച വാഹനം തിരിച്ചറിഞ്ഞു.