കണ്ണൂർ: കൂത്തുപറമ്പിൽ വയോധികയുടെ മാല പൊട്ടിച്ച കേസിൽ സിപിഎം കൗൺസിലർ അറസ്റ്റിൽ. കൂത്തുപറമ്പ് നഗരസഭയിലെ കൗൺസിലറായ പി.പി. രാജേഷ് ആണ് അറസ്റ്റിലായത്. കഴിഞ്ഞ വ്യാഴാഴ്ചയാണ് 77 വയസുള്ള ജാനകി എന്ന വയോധികയുടെ മാല ഇയാൾ കവർന്നത്. ജാനകി വീട്ടിൽ തനിച്ചായിരുന്ന സമയത്തായിരുന്നു മോഷണം.അടുക്കളയിൽ ജോലി ചെയ്യുകയായിരുന്ന വയോധികയുടെ അടുത്തേക്ക് വീടിന്റെ മുൻവാതിൽ തുറന്ന് അകത്തുകയറിയ ഒരാൾ മാല പൊട്ടിച്ച് ഓടി രക്ഷപ്പെടുകയായിരുന്നു.

മോഷ്ടാവ് ഹെൽമറ്റ് ധരിച്ചിരുന്നതായി ജാനകി പോലീസിന് നൽകിയ പരാതിയിൽ പറഞ്ഞിരുന്നു. മോഷ്ടാവ് ആരാണെന്ന് ആർക്കും തിരിച്ചറിയാൻ കഴിഞ്ഞിരുന്നില്ല.തുടർന്ന് സി.സി.ടി.വി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ മോഷ്ടാവ് സഞ്ചരിച്ച വാഹനം തിരിച്ചറിഞ്ഞു. ഇതിൽ നിന്നാണ് നാലാം വാർഡ് കൗൺസിലറായ പി.പി. രാജേഷിലേക്ക് പോലീസ് എത്തിയത്. രണ്ട് ദിവസത്തെ അന്വേഷണത്തിനൊടുവിൽ പ്രതിയെ പിടികൂടുകയും ഇയാൾ കുറ്റം സമ്മതിക്കുകയും ചെയ്തതായി കൂത്തുപറമ്പ് പോലീസ് അറിയിച്ചു. ഇയാളിൽ നിന്ന് മോഷ്ടിച്ച ഒരു പവൻ സ്വർണമാല കണ്ടെടുത്തു.