പത്തനംതിട്ട: മോഷണശ്രമത്തിനിടെ പോലീസുകാരന്റെ ഭാര്യ തീകൊളുത്തി ഗുരുതരമായി പരിക്കേറ്റ് ചികിത്സയിലായിരുന്ന സ്ത്രീ മരിച്ചു. കീഴ്വായ്പൂരിലെ ആശാ വർക്കർ ലതാകുമാരി, 61 വയസാണ് മരിച്ചത്. വെള്ളിയാഴ്ച രാത്രിയോടെ കോട്ടയം മെഡിക്കൽ കോളേജ് ആശുപത്രിയിലായിരുന്നു അന്ത്യം. ഒക്ടോബർ 9നാണ് സംഭവം. അയൽവാസിയും പോലീസ് ക്വാർട്ടേഴ്സിലെ താമസക്കാരിയുമായ സുമയ്യ, ലതാകുമാരിയുടെ വീട്ടിൽ അതിക്രമിച്ചു കയറി അവരെ ആക്രമിച്ച് സ്വർണ്ണാഭരണങ്ങൾ മോഷ്ടിക്കുകയും വീടിന് തീയിടുകയും ചെയ്യുകയായിരുന്നു. സിവിൽ പോലീസ് ഓഫീസറുടെ ഭാര്യയാണ് സുമയ്യ. ഇവർ സ്റ്റോക്ക് ട്രേഡിംഗിൽ കനത്ത നഷ്ടം സംഭവിച്ചതായ് സൂചനയുണ്ട്. കൂടാതെ മൊബൈൽ ലോൺ ആപ്പുകൾ വഴി പണം കടം വാങ്ങിയതായും പോലീസ് പറയുന്നു.
മുൻപ് സംഭവിച്ച ഒരു പക്ഷാഘാതം മൂലം ലതയുടെ ആരോഗ്യം മോശമായിരുന്നു. ബലപ്രയോഗത്തിലൂടെ ലതയെ കീഴ്പ്പെടുത്താമെന്നായിരുന്നു സുമയ്യയുടെ കണക്കുകൂട്ടൽ. എന്നാൽ ലതാകുമാരി രക്ഷപ്പെട്ട് സഹായത്തിനായി കീഴ്വായ്പൂർ പോലീസ് സ്റ്റേഷനിലേക്ക് ഓടി. ഏകദേശം 50 ലക്ഷം രൂപ നഷ്ടപ്പെട്ട സുമയ്യ നഷ്ടം നികത്താൻ ലതകുമാരിയോട് സ്വർണം ആവശ്യപ്പെട്ടിരുന്നു. അങ്ങനെയാണ് ക്വാർട്ടേഴ്‌സിന് സമീപം താമസിക്കുന്ന തന്റെ സുഹൃത്ത് ലതയോട് ഒരു ലക്ഷം രൂപ വായ്പ ചോദിച്ചത്. എന്നാൽ പണം കിട്ടാതെ വന്നതോടെ സ്വർണ്ണാഭരണങ്ങൾ ചോദിച്ചു. പക്ഷേ ലത അതിനും തയ്യാറായില്ല. ഇതോടെ സ്വർണ്ണ മാലയും മൂന്ന് വളകളും മോഷ്ടിച്ചു. ആഭരണങ്ങൾ പിന്നീട് പോലീസ് ക്വാർട്ടേഴ്സിലെ ടോയ്‌ലറ്റ് ഫ്ലഷിൽ നിന്ന് കണ്ടെടുത്തു.