പത്തനംതിട്ട: ശബരിമല സ്വര്‍ണക്കൊള്ളയിൽ സ്‌പോണ്‍സറായ ഉണ്ണികൃഷ്ണന്‍ പോറ്റി രണ്ട് കിലോ സ്വര്‍ണം കൈക്കലാക്കിയെന്ന് പ്രത്യേക അന്വേഷണ സംഘത്തിന്റെ റിമാന്‍ഡ് റിപ്പോര്‍ട്ട്. കൈവശപ്പെടുത്തിയ സ്വര്‍ണം വീണ്ടെടുക്കുന്നതിനായി ഇദ്ദേഹത്തെ കസ്റ്റഡിയിൽ എടുക്കേണ്ടത് അത്യാവശ്യമാണെന്നും റിപ്പോർട്ടിൽ പറയുന്നു. ദ്വാരപാലക ശില്‍പങ്ങളിലും കട്ടിളപ്പാളികളിലുമായി ഘടിപ്പിച്ചിരുന്ന ഏകദേശം 2 കിലോഗ്രാം തൂക്കം വരുന്ന സ്വര്‍ണം പതിച്ച ചെമ്പ് തകിടുകള്‍ അറ്റകുറ്റപ്പണിക്കെന്ന പേരിൽ വിശ്വാസ വഞ്ചന നടത്തി കൊണ്ടുപോയി എന്നാണ് റിമാൻഡ് റിപ്പോർട്ടിലെ പരാമർശം.
നിയമപരമായ ഉത്തരവുകളും നടപടിക്രമങ്ങളും ലംഘിച്ച് സ്വര്‍ണം കൈക്കലാക്കിയ ശേഷം ഇത് ബെംഗളൂരുവിലും ഹൈദരാബാദിലും തുടർന്ന് ചെന്നൈയിലെ സ്മാര്‍ട്ട് ക്രിയേഷന്‍സിലും എത്തിച്ചു. ഇതിനുശേഷം 394 ഗ്രാം സ്വര്‍ണം മാത്രം പൂശി, ബാക്കി സ്വര്‍ണം സ്വന്തമാക്കി തിരുവിതാംകൂര്‍ ദേവസ്വം ബോര്‍ഡിന് അന്യായമായ നഷ്ടം വരുത്തിയെന്നും റിപ്പോർട്ടിലുണ്ട്. പിന്നീട് ദ്വാരപാലകശില്‍പങ്ങളും പാളികളും തകിടുകളും ചെന്നൈ, ബെംഗളൂരു, കേരളം എന്നിവിടങ്ങളിലെ പല വീടുകളിലും ക്ഷേത്രങ്ങളിലുമായി യാതൊരു സുരക്ഷയുമില്ലാതെ എത്തിച്ച് പൂജ നടത്തിയതായും റിപ്പോർട്ടിൽ പരാമർശിക്കുന്നു. ഈ മാസം 30 വരെയാണ് കോടതി ഉണ്ണികൃഷ്ണൻ പോറ്റിയെ കസ്റ്റഡിയിൽ വിട്ടത്.