തിരുവനന്തപുരം: പള്ളിപ്പുറത്ത് വയോധികയുടെ മൃതദേഹം സംസ്കരിക്കുന്നതിനിടെ ശരീരത്തിനുള്ളിൽ ഘടിപ്പിച്ചിരുന്ന പേസ് മേക്കർ പൊട്ടിത്തെറിച്ച് ഒരാൾക്ക് ഗുരുതരമായി പരിക്കേറ്റു. കരിച്ചാറ സ്വദേശിയായ സുന്ദരന്റെ കാലിലാണ് പേസ് മേക്കറിന്റെ ഭാഗങ്ങൾ തുളച്ചുകയറിയത്. ചൊവ്വാഴ്ച മരണപ്പെട്ട പള്ളിപ്പുറം സ്വദേശി വിമലയമ്മയുടെ മൃതദേഹം ഇന്നലെ ഉച്ചയോടെ വീട്ടു വളപ്പിൽ സംസ്കരിക്കുന്നതിനിടെയായിരുന്നു സംഭവം. മൃതദേഹം ചിതയിലേക്ക് വെച്ചതിന് പിന്നാലെ പേസ് മേക്കർ ഉഗ്ര ശബ്ദത്തോടെ പൊട്ടിത്തെറിക്കുകയായിരുന്നു.

ഇതിന്റെ ചീളുകളാണ് സമീപത്തുണ്ടായിരുന്ന സുന്ദരന്റെ കാൽമുട്ടിൽ തുളച്ചുകയറിയത്. പരിഭ്രാന്തരായ വീട്ടുകാർ ഉടൻ തന്നെ സുന്ദരനെ കഴക്കൂട്ടത്തെ സ്വകാര്യ ആശുപത്രിയിൽ പ്രവേശിപ്പിച്ചു. ഹൃദ്രോഗിയായിരുന്ന വീട്ടമ്മയ്ക്ക് അടുത്തിടെയാണ് പേസ് മേക്കർ ഘടിപ്പിച്ചത്. സാധാരണയായി മൃതദേഹം ദഹിപ്പിക്കുന്നതിന് മുൻപ് പേസ് മേക്കർ നീക്കം ചെയ്യാറുണ്ട്. എന്നാൽ വയോധികയുടെ മരണം വീട്ടിൽ വെച്ചായിരുന്നതിനാൽ ഇത് നീക്കം ചെയ്യാൻ സാധിച്ചില്ല. മരണശേഷം വീട്ടുകാർ പേസ് മേക്കർ ഘടിപ്പിച്ചിരുന്ന വിവരം ആശുപത്രി അധികൃതരെ വിളിച്ചറിയിച്ചിരുന്നു.