കാസര്‍കോട്: വീട്ടിൽ ജീവനൊടുക്കാൻ ശ്രമിച്ച പെൺകുട്ടിയെ രക്ഷിച്ച് ആശുപത്രിയിലേക്ക് കൊണ്ടുപോകു ന്നവഴി വാഹനാപകടത്തിൽപ്പെട്ട് മരിച്ചു. കാസർകോട് കുറ്റിക്കോൽ ബേത്തൂർപാറയിലാണ് അപകടം നടന്നത്.ബേത്തൂർപാറ തച്ചാർകുണ്ട് വീട്ടിൽ പരേതനായ ബാബുവിന്റെ മകൾ മഹിമ (20) യാണ് മരിച്ചത്. കാസർകോട്ടെ നുള്ളിപ്പാടിയിൽ നഴ്‌സിങ് വിദ്യാർഥിനിയായിരുന്നു അപകടത്തിൽ മരിച്ച മഹിമ. സംഭവത്തിൽ മഹിമയുടെ അമ്മ വനജയ്ക്കും സഹോദരൻ മഹേഷിനും പരിക്കേറ്റു.
ഇന്ന് രാവിലെ എട്ടുമണിയോടെയാണ് സംഭവം. വീടിനുള്ളിലെ മുറിയിൽ തൂങ്ങി മരിക്കാൻ ശ്രമിച്ച മഹിമയെ ഉടൻ തന്നെ സഹോദരനും അമ്മയും ചേർന്ന് താഴേക്കിറക്കി ആശുപത്രിയിലേക്ക് കൊണ്ടുപോവുകയായിരുന്നു. ആശുപത്രിയിലേക്ക് പോകുന്ന വഴി വാഹനം അപകടത്തിൽപ്പെട്ടു. ഉടൻ തന്നെ സ്ഥലത്തെത്തിയ നാട്ടുകാർ പരിക്കേറ്റ മൂന്നുപേരെയും കാസർകോട് ചെർക്കളയിലെ ആശുപത്രിയിൽ പ്രവേശിപ്പിച്ചിരുന്നു. എന്നാൽ, മഹിമയുടെ ജീവൻ രക്ഷിക്കാൻ സാധിച്ചില്ല.