ശബരിമല സ്വർണ്ണ മോഷണ വിവാദത്തിൽ മുന്‍ ദേവസ്വം ബോര്‍ഡ് പ്രസിഡന്റ് എ പത്മകുമാറിന് കുരുക്ക് മുറുകുന്നു. ശബരിമലയിലെ യോഗ ദണ്ഡ് സ്വര്‍ണം കെട്ടിച്ചതിനെക്കുറിച്ചും പ്രത്യേക സംഘം അന്വേഷണം നടത്തും. സ്വര്‍ണം കെട്ടിച്ചത് എ പത്മമകുമാറിന്റെ മകനാണ്. പത്മകുമാര്‍ അധികാര ദുര്‍വിനിയോഗം നടത്തിയെന്നാണ് അന്വേഷണ സംഘത്തിന്റെ വിലയിരുത്തല്‍. അതേസമയം മകന്റെ വഴിപാടായിട്ടാണ് യോഗ ദണ്ഡും രുദ്രാക്ഷമാലയും അറ്റകുറ്റപ്പണി ചെയ്ത് നല്‍കിയത് എന്നാണ് എ പത്മകുമാറിന്റെ വിശദീകരണം. ക്ഷേത്രനടയ്ക് മുന്നില്‍ വെച്ച് തന്നെ യോഗ ദണ്ഡിന്റെ അറ്റകുറ്റപണികള്‍ നടത്തി തിരിച്ചുകൊടുക്കുകയാണ് ഉണ്ടായതെന്നും വാദം. രുദ്രാക്ഷമാല കഴുകി നല്‍കിയതാണെന്നും തന്ത്രി പറഞ്ഞ പ്രകാരമാണ് ഇതു ചെയ്തു നല്‍കിയതെന്നും എ പത്മകുമാര്‍ പറഞ്ഞു.
ദേവസ്വം വിജിലന്‍സും സംഭവം അന്വേഷിക്കും. സംഭവത്തിന്റെ അടിസ്ഥാനത്തില്‍ പത്മകുമാറിന്റെ ഭാഗത്തു നിന്നും ഉണ്ടായിരിക്കുന്നത് ഗുരുതരമായ കൃത്യവിലോപമാണ്. അധികാര ദുര്‍വിനിയോഗമാണ് എന്നു കണ്ടെത്തിയതിന്റെ അടിസ്ഥാനത്തിലാണ് ഹൈക്കോടതിയില്‍ റിപ്പോര്‍ട്ട് സമർപ്പിച്ചത്. റിപ്പോര്‍ട്ട് പ്രത്യേക അന്വേഷണ സംഘം പരിശോധന നടത്തി. ദേവസ്വം വിജിലന്‍സ് എസ്പിയുമായടക്കം അന്വേഷണ സംഘം പലതവണ കൂടിയാലോചനകള്‍ നടത്തിയിട്ടുണ്ട്. യോഗ ദണ്ഡ് സ്വര്‍ണം പൂശിയതുമായി ബന്ധപ്പെട്ട് കൃത്യമായി കേസെടുത്ത് മുന്നോട്ട് പോകുമ്പോള്‍ നിയമപരമായി കേസ് നിലനില്‍ക്കുമെന്നാണ് വിലയിരുത്തല്‍.