ഡിപ്രഷനെക്കുറിച്ചും മൂഡ് സ്വിങ്സിനെക്കുറിച്ചും പറഞ്ഞുപോയ അഭിപ്രായങ്ങളെ തുടർന്ന് സോഷ്യൽ മീഡിയയിൽ ഉയരുന്ന വിമർശനങ്ങളിൽ പ്രതികരണവുമായി നടി കൃഷ്ണപ്രഭ. പറഞ്ഞ കാര്യങ്ങളിൽ തെറ്റുണ്ടെന്ന് തോന്നുന്നില്ല. ഈ കോലാഹലം ഉണ്ടാക്കുന്നവർ തന്റെ അഭിമുഖം പൂർണ്ണമായി കാണാത്തവരാണെന്നും പറഞ്ഞത് ആളുകൾ പൂർണ്ണമായി മനസ്സിലാക്കിയിട്ടില്ലെന്നും നടി.
ചിലർ റീച്ചിനായി തന്റെ വീഡിയോ അനാവശ്യമായി പ്രചരിപ്പിക്കുകയാണെന്നും, പറഞ്ഞ കാര്യത്തിൽ തെറ്റുണ്ടെന്ന് തോന്നുന്നില്ലെന്നും നടി വ്യക്തമാക്കി. ആരും വെറുതെ ഇരിക്കരുതെന്നാണ് പറഞ്ഞത്. മനുഷ്യന്റെ മനസ്സല്ലേ, അത് പിന്നീട് ഓവർ തിങ്കിങ്ങും മൂഡ് സ്വിങ്സുമായി മാറും. ഈ വാക്കുകൾ നമ്മൾ കേൾക്കാൻ തുടങ്ങിയിട്ട് കുറച്ച് വർഷങ്ങളേ ആയിട്ടുള്ളൂ. ശാസ്ത്രത്തെ തള്ളിപ്പറഞ്ഞതല്ല. പല കാര്യങ്ങളിലും അനാവശ്യമായി അഡിക്ഷൻ ആകുന്നത് കൊണ്ടാണ് ഇത്തരം പ്രശ്നങ്ങൾ ഉണ്ടാകുന്നതെന്നും നടി ന്യായീകരിച്ചു.
കാര്യങ്ങളെ വെറുതേ ഊതിപ്പെരുപ്പിക്കരുതെന്നും നടി റിപ്പോർട്ടർ ടിവിയോട് പ്രതികരിച്ചു. അതേസമയം, നിരവധി പേരാണ് കൃഷ്ണപ്രഭയ്‌ക്കെതിരെ രംഗത്ത് വരുന്നത്. ഗായിക അഞ്ചു ജോസഫ് വളരെ രൂക്ഷമായാണ് കൃഷ്ണപ്രഭയുടെ അഭിപ്രായത്തോട് പ്രതികരിച്ചത്. ക്ലിനിക്കൽ ഡിപ്രഷനും ആൻസൈറ്റി ഡിസോഡറും അനുഭവിച്ച വ്യക്തിയെന്ന നിലയിൽ മാനസികാരോഗ്യ പ്രശ്നങ്ങൾ യാഥാർത്ഥ്യമാണെന്ന് ഉറച്ചു പറയാൻ തനിക്ക് സാധിക്കുമെന്നാണ് ഗായിക അഞ്ചു വിഷയത്തിൽ പ്രതികരിച്ചത്.