തിരുവനന്തപുരം: ശബരിമല സ്വർണ്ണ മോഷണ കേസിൽ ഉണ്ണികൃഷ്ണൻ പോറ്റിയെ ഒന്നാം പ്രതിയാക്കി പ്രത്യേക അന്വേഷണ സംഘം കേസെടുത്തു. ദേവസ്വം ജീവനക്കാരെയും കേസിൽ പ്രതിചേർക്കും. ക്രൈംബ്രാഞ്ച് ആസ്ഥാനത്താണ് എഫ്ഐആർ രജിസ്റ്റർ ചെയ്തത്. സ്വർണ്ണ വിവാദത്തിൽ കേസെടുക്കാൻ വൈകുന്നതിൽ ആരോപണങ്ങൾ ഉയർന്നിരുന്നു. ഹൈക്കോടതി ഉത്തരവിറങ്ങി 24 മണിക്കൂറിന് ശേഷമാണ് എഫ്ഐആർ രജിസ്റ്റർ ചെയ്തത്. ഹൈക്കോടതി ഉത്തരവ് പ്രകാരം ഇന്നലെ വൈകിട്ട് തിരുവിതാംകൂർ ദേവസ്വം കമ്മീഷണർ പരാതി സമർപ്പിച്ചിരുന്നു. ഉണ്ണികൃഷ്ണൻ പോറ്റി മുൻകൂർ ജാമ്യത്തിന് അപേക്ഷ നൽകാനുള്ള നീക്കം ആരംഭിച്ചിട്ടുണ്ട്.

ശബരിമലയുടെ മറവിൽ ഉണ്ണികൃഷ്ണൻ പോറ്റി ലക്ഷങ്ങൾ തട്ടിയെടുത്തെന്നാണ് വിജിലൻസ് റിപ്പോർട്ട്. ആരോപണ വിധേയരായ ജീവനക്കാർക്കെതിരായ നടപടി ചൊവ്വാഴ്ച തീരുമാനിക്കുമെന്ന് ദേവസ്വം ബോർഡ് പ്രസിഡന്റ് പി.എസ്. പ്രശാന്ത് പ്രതികരിച്ചു. ദ്വാരപാലക ശില്പപാളികളിലെ സ്വർണ്ണക്കള്ളയും കട്ടിളപടിയിലെ സ്വർണ്ണപ്പാളി ചെമ്പാക്കിയ അട്ടിമറിയുമാണ് പ്രത്യേക അന്വേഷണ സംഘം ആദ്യം അന്വേഷിക്കുക. 2019 ഫെബ്രുവരിയിൽ എക്സിക്യൂട്ടീവ് ഓഫീസർ തയ്യാറാക്കിയ ഉത്തരവിൽ കട്ടിളപ്പടിയിലെ പാളികൾ സ്വർണം എന്നായിരുന്നു. ഇത് ദേവസ്വം കമ്മീഷണർ തിരുത്തി ചെമ്പ് എന്ന് ആക്കുകയും ദേവസ്വം ബോർഡിന്റെ ഉത്തരവിൽ അത് ആവർത്തിക്കുകയും ചെയ്തതാണ് ദേവസ്വം ബോർഡിനെ പ്രതിക്കൂട്ടിൽ നിർത്തുന്നത്. പത്മകുമാറിന്റെ കഴിഞ്ഞ ദിവസത്തെ പ്രതികരണത്തെക്കുറിച്ചും അന്വേഷണം നടക്കും.