കോള്‍ഡ്രിഫ് (Coldrif) സിറപ്പിന്റെ വിതരണവും വിൽപനയും സംസ്ഥാനത്ത് പൂർണമായും നിർത്തിവെക്കാൻ കേരളാ ഡ്രഗ്‌സ് കൺട്രോൾ വകുപ്പ് നിർദേശം നൽകിയതായി ആരോഗ്യ മന്ത്രി വീണാ ജോർജ് അറിയിച്ചു. മധ്യപ്രദേശ്, രാജസ്ഥാൻ എന്നിവിടങ്ങളിൽ 11 കുട്ടികളുടെ മരണവുമായി ബന്ധപ്പെട്ട് കോള്‍ഡ്രിഫ് ചുമ സിറപ്പ് സംശയനിഴലിലായതും, തമിഴ്നാട് സർക്കാർ ഇതിന്റെ വിൽപന നിരോധിച്ചതും കണക്കിലെടുത്താണ് കേരളത്തിന്റെ നടപടി.
പുറത്തുനിന്നുള്ള റിപ്പോർട്ടുകൾ പ്രകാരം, പ്രശ്നങ്ങളുള്ളതായി കണ്ടെത്തിയ കോള്‍ഡ്രിഫ് സിറപ്പിന്റെ എസ് ആർ 13 ബാച്ച് കേരളത്തിൽ വിൽപന നടത്തിയിട്ടില്ലെന്നാണ് ഡ്രഗ്‌സ് കൺട്രോൾ വകുപ്പിന്റെ പ്രാഥമിക അന്വേഷണത്തിൽ വ്യക്തമായത്. എങ്കിലും സുരക്ഷാ മുൻകരുതലിന്റെ ഭാഗമായി, സംസ്ഥാനത്തെ 8 വിതരണക്കാർ വഴിയുള്ള മരുന്നിന്റെ വിതരണവും മെഡിക്കൽ സ്റ്റോറുകൾ വഴിയുള്ള വിൽപനയും നിർത്തിവെക്കാൻ ഡ്രഗ്‌സ് ഇൻസ്പെക്ടർമാർക്ക് നിർദേശം നൽകിയിട്ടുണ്ട്.
സംസ്ഥാനത്ത് ഡ്രഗ്‌സ് കൺട്രോൾ വകുപ്പിന്റെ നേതൃത്വത്തിൽ ശക്തമായ പരിശോധനകൾ നടന്നു വരുന്നുണ്ട്. കോള്‍ഡ്രിഫ് സിറപ്പിന്റെ സാമ്പിളുകൾ ശേഖരിച്ച് പരിശോധന ആരംഭിച്ചിട്ടുണ്ട്. ഇതിനുപുറമെ, മറ്റ് ചുമ സിറപ്പുകളുടേയും, കേരളത്തിൽ ചുമ മരുന്നുകൾ നിർമ്മിക്കുന്ന 5 കമ്പനികളുടെ മരുന്ന് സാമ്പിളുകളുടേയും പരിശോധന നടത്താനും ആരോഗ്യവകുപ്പ് നിർദേശം നൽകിയിട്ടുണ്ട്.