തിരുവനന്തപുരം: സ്വർണ പാളി വിവാദത്തിൽ ദേവസ്വം വിജിലൻസിന്റെ കണ്ടെത്തലുകളെക്കുറിച്ചുള്ള കൂടുതൽ വിവരങ്ങൾ പുറത്ത്. അധികമായി വന്ന സ്വർണം ഉപയോഗിക്കുന്നതിന് ഉണ്ണികൃഷ്ണൻ പോറ്റി ദേവസ്വം ബോർഡിന്റെ അനുമതി തേടിയിരുന്നതായി റിപ്പോർട്ട്.
ബാക്കി വന്ന സ്വർണ്ണം ഒരു പെൺകുട്ടിയുടെ വിവാഹം നടത്താനായി ഉപയോഗിക്കാൻ അനുവദിക്കണമെന്ന് ആവശ്യപ്പെട്ടുകൊണ്ടാണ് അദ്ദേഹം അപേക്ഷ സമർപ്പിച്ചത്. അന്നത്തെ ദേവസ്വം പ്രസിഡന്റായിരുന്ന എ. പത്മകുമാറിന് ഉണ്ണികൃഷ്ണൻ പോറ്റി അയച്ച ഇ-മെയിലിന്റെ വിവരങ്ങളാണ് ഇപ്പോൾ പുറത്തായത്.
2019-ൽ അന്നത്തെ ദേവസ്വം പ്രസിഡന്റായിരുന്ന പത്മകുമാറിന് ഉണ്ണികൃഷ്ണൻ പോറ്റി അയച്ച ഇ-മെയിൽ സന്ദേശമാണ് ഇപ്പോൾ പുറത്തുവന്നിരിക്കുന്നത്. സ്വർണ്ണ പാളിയുടെ പണി പൂർത്തിയാക്കിയ ശേഷം സ്വർണ്ണം ബാക്കിവന്നു എന്ന് പോറ്റി ഈ മെയിലിൽ പറയുന്നു. ഈ അധിക സ്വർണ്ണം വിനിയോഗിക്കുന്നതിന് ദേവസ്വം ബോർഡിന്റെ അനുമതി തേടിയ വിവരങ്ങളാണ് കത്തിലുള്ളത്. ഇ-മെയിലിൽ അയച്ച ഈ കത്തിന്റെ വിവരങ്ങൾ ഹൈക്കോടതി ഉത്തരവിലാണ് പരാമർശിച്ചിരിക്കുന്നത്.
2019-ലെയും 2025-ലെയും ദ്വാരപാലക സ്വർണ്ണപ്പാളികളുടെ ചിത്രങ്ങൾ തമ്മിൽ വ്യത്യാസമുണ്ടെന്നാണ് വിജിലൻസ് റിപ്പോർട്ട്. നിലവിലെ പാളിയെ 2019-ലെ ഫോട്ടോയുമായി താരതമ്യം ചെയ്യാൻ കോടതി അനുമതി നൽകിയിട്ടുണ്ട്. കൂടാതെ, 1999-ൽ സ്വർണ്ണം പൂശിയത് തന്നെയാണ് എന്ന് വിജിലൻസ് അറിയിച്ചെങ്കിലും അതിന്റെ രേഖകൾ കണ്ടെത്താൻ കഴിഞ്ഞിട്ടില്ല.
ഏറ്റവും പ്രധാനമായി, 2019-ൽ ഉണ്ണികൃഷ്ണൻ പോറ്റിക്ക് കൈമാറിയത് യഥാർത്ഥത്തിൽ 1.564 കിലോഗ്രാം തൂക്കമുള്ള സ്വർണ്ണപ്പാളി തന്നെയായിരുന്നു എന്നും, എന്നാൽ അത് ഉദ്യോഗസ്ഥർ മനഃപൂർവം 'ചെമ്പ് പാളി' എന്ന് രേഖപ്പെടുത്തിയെന്നും വിജിലൻസ് റിപ്പോർട്ടിൽ പറയുന്നു. എങ്കിലും, ഉണ്ണികൃഷ്ണൻ പോറ്റി 'സ്മാർട്ട് ക്രിയേഷൻസിന്' എത്തിച്ചുനൽകിയത് വേറെ ചെമ്പ് പാളിയാകാനുള്ള സാധ്യതയും സംശയവും വിജിലൻസ് റിപ്പോർട്ടിൽ ചൂണ്ടിക്കാണിക്കുന്നുണ്ട്.