തെലുങ്ക് നടൻ വിജയ് ദേവരക്കൊണ്ട സഞ്ചരിച്ചിരുന്ന കാർ തിങ്കളാഴ്ച വൈകുന്നേരം അപകടത്തിൽപ്പെട്ടു. ജോ​ഗു​ലം​ബ ഗ​ദ്​​വാ​ൽ ജില്ലയിലെ ഉണ്ടാവല്ലിയിൽ വെച്ചാണ് അപകടമുണ്ടായത്. താരത്തിന് പരിക്കുകളൊന്നുമില്ല, അദ്ദേഹം സുരക്ഷിതനാണെന്ന് റിപ്പോർട്ടുകൾ പറയുന്നു. പുട്ടപർത്തിയിൽ നിന്ന് ഹൈദരാബാദിലേക്ക് മടങ്ങുന്നതിനിടെയാണ് സംഭവം. ദേശീയ പാത 44-ൽ, വരസിദ്ധി വിനായക കോട്ടൺ മില്ലിന് സമീപമായിരുന്നു അപകടം.

നന്ദികോട്കൂറിൽ നിന്ന് പേബ്ബെയറിലേക്ക് ആടുകളുമായി വന്ന ഒരു ട്രക്ക് പെട്ടെന്ന് ബ്രേക്ക് ചെയ്തതാണ് അപകടത്തിന് വഴിവെച്ചത്. ഇതേത്തുടർന്ന്, വിജയ് ദേവരക്കൊണ്ടയുടെ കാർ എതിരെ വന്ന ബൊലേറോ പിക്കപ്പുമായി കൂട്ടിയിടിച്ചു. താരത്തിന്റെ വാഹനത്തിന് ഭാഗികമായി കേടുപാടുകൾ സംഭവിച്ചു.അപകടത്തിൽ ആർക്കും പരിക്കേറ്റിട്ടില്ല. അപകടത്തെ തുടർന്ന് വിജയ് ദേവരക്കൊണ്ട തൻ്റെ സുഹൃത്തിൻ്റെ കാറിൽ ഹൈദരാബാദിലേക്കുള്ള യാത്ര തുടർന്നു.