ചെന്നൈ: നടൻ വിജയിയുടെ പാർട്ടിയായ തമിഴക വെട്രി കഴകത്തിന്റെ സംസ്ഥാനപര്യടനത്തിന്റെ ഭാഗമായി നടത്തിയ റാലിയിൽ തിരക്കിലും പെട്ട് 41 പേർ മരിച്ച സംഭവത്തിൽ വിജയിയെ രൂക്ഷമായി വിമർശിച്ച് മദ്രാസ് ഹൈക്കോടതി. സ്വന്തം പാർട്ടിയുടെ പരിപാടിക്ക് എത്തിയ സ്ത്രീകളും കുട്ടികളും അടക്കം മരിച്ചു കിടക്കുമ്പോൾ നേതാവ് മുങ്ങി ഇതെന്ത് നേതാവാണ്? ഇതെന്ത് പാർട്ടിയാണ്? എന്നാണ് മദ്രാസ് ഹൈക്കോടതി കുറ്റപ്പെടുത്തിയത്. കരൂർ ദുരന്തത്തിൽ ടിവികെ അധ്യക്ഷൻ വിജയിക്കെതിരെ കേസെടുക്കണമെന്ന ഹർജി പരിഗണിച്ച മദ്രാസ് ഹൈക്കോടതി പ്രിൻസിപ്പൽ ബെഞ്ച് അതിരൂക്ഷ വിമർശനമാണ് വിജയ്ക്കെതിരെ നടത്തിയത്.
കൂടാതെ കരൂർ ദുരന്തത്തിന്റെ പശ്ചാത്തലത്തിൽ പ്രത്യേക അന്വേഷണ സംഘത്തെ നിയോഗിച്ച് മദ്രാസ് ഹൈക്കോടതി. ദുരന്തം മനുഷ്യനിർമിതമാണ് എന്ന് രൂക്ഷമായി വിമർശിച്ച കോടതി, തമിഴ്‌നാട്ടിലെ പൊതുനിരത്തിലെ റാലികൾക്കും പാർട്ടി പരിപാടികൾക്കും താൽക്കാലികമായി വിലക്ക് ഏർപ്പെടുത്തി. പൊതുനിരത്തുകളിൽ പരിപാടികൾ നടത്തുന്നതിന് ആവശ്യമായ പൊതുമാനദണ്ഡം പുറത്തിറക്കും വരെയാണ് ഈ വിലക്ക് തുടരുക.
നേതാവ് ഖേദം പ്രകടിപ്പിക്കാതിരുന്നത് അദ്ദേഹത്തിന്റെ മനോനില വ്യക്തമാക്കുന്നുവെന്ന് കോടതി നിരീക്ഷിച്ചു. പാർട്ടി പ്രവർത്തകർപോലും സംഭവസ്ഥലത്തുനിന്ന് കടന്നുകളഞ്ഞു എന്നും കോടതി പറഞ്ഞു. ഈ സാഹചര്യത്തിലാണ് നോർത്ത് സോൺ ഐജി അസ്റ ഗാർഗിന്റെ നേതൃത്വത്തിൽ പ്രത്യേക അന്വേഷണ സംഘം കേസ് അന്വേഷിക്കണമെന്ന് കോടതി ഉത്തരവിട്ടത്. ഹർജി പരിഗണിക്കുമ്പോൾ സംസ്ഥാന സർക്കാരിനെയും കോടതി രൂക്ഷമായി വിമർശിച്ചു. നടൻ വിജയ്യോട് സർക്കാരിന് വിധേയത്വമുണ്ടോ എന്ന് ചോദിച്ച കോടതി, പോലീസിന്റെ നിഷ്‌ക്രിയത്വം തന്നെ അത്ഭുതപ്പെടുത്തിയെന്നും അഭിപ്രായപ്പെട്ടു.
പരിപാടിയുടെ സംഘാടകർ എന്ന നിലയിൽ ടിവികെ (തമിഴക വെട്രി കഴകം) നേതാക്കൾക്ക് ജനങ്ങളോട് ഉത്തരവാദിത്വം ഇല്ലേ എന്ന് കോടതി ചോദിച്ചു. എന്നാൽ, ജില്ലാ നേതാക്കളായിരുന്നു പരിപാടിയുടെ സംഘാടകർ എന്നായിരുന്നു ടിവികെ നേതാക്കളുടെ വാദം. ഡി.എം.കെയുടെ (DMK) ഏതെങ്കിലും പരിപാടിയിൽ ഇത്തരം ഒരപകടം ഉണ്ടായാൽ പാർട്ടി സെക്രട്ടറിയെ അറസ്റ്റ് ചെയ്യുമോ എന്ന് ടിവികെയുടെ അഭിഭാഷകർ ഹൈക്കോടതിയോട് ചോദിച്ചു. പോലീസിന്റെ ലാത്തിച്ചാർജ് ആണ് സംഭവസ്ഥലത്ത് പ്രശ്‌നമുണ്ടാക്കിയതെന്നും ടിവികെ കോടതിയിൽ ബോധിപ്പിച്ചു.