സൗന്ദര്യം വർദ്ധിപ്പിക്കാനായി സ്തന ശസ്ത്രക്രിയ നടത്തിയെന്ന് സംശയിക്കുന്ന സ്ത്രീകൾക്കെതിരെ ഉത്തരകൊറിയൻ ഭരണകൂടം ശിക്ഷാ നടപടികളുമായി രംഗത്ത്. സ്തന ഇംപ്ലാന്റുകൾ മുതലാളിത്തത്തിന്റെ ഭാഗമാണെന്നും സോഷ്യലിസത്തിന് എതിരാണെന്നും പ്രഖ്യാപിച്ചാണ് ഈ നീക്കം. കുറ്റക്കാരാണെന്ന് കണ്ടെത്തുന്ന സ്ത്രീകളും ശസ്ത്രക്രിയ നടത്തുന്ന ഡോക്ടർമാരും നടപടി നേരിടേണ്ടിവരും.

ശരീരത്തിൽ മാറ്റങ്ങൾ പ്രകടമായ സ്ത്രീകളെ കണ്ടെത്താൻ രാജ്യവ്യാപകമായി പരിശോധന നടത്തുമെന്നും വാർത്താ ഏജൻസികൾ റിപ്പോർട്ട് ചെയ്യുന്നു. ഉത്തരകൊറിയയിൽ സൗന്ദര്യ വർധനവിനായുള്ള ശസ്ത്രക്രിയകൾക്ക് നിരോധനം ഏർപ്പെടുത്തിയിട്ടുണ്ട്. ഇവയെല്ലാം സോഷ്യലിസ്റ്റ് വിരുദ്ധ പ്രവൃത്തികളായാണ് ഭരണകൂടം കണക്കാക്കുന്നത്.

അടുത്തിടെ, സ്തന സൗന്ദര്യം വർദ്ധിപ്പിക്കാൻ ശസ്ത്രക്രിയ നടത്തിയ രണ്ട് സ്ത്രീകളെയും അതിന് കൂട്ടുനിന്ന ഡോക്ടറെയും നിയമനടപടികൾക്ക് വിധേയരാക്കിയിരുന്നു. നടപടി നേരിട്ടത് 20 വയസ്സുള്ള യുവതികളാണ് എന്ന് ദക്ഷിണ കൊറിയൻ വാർത്താ ഏജൻസി റിപ്പോർട്ട് ചെയ്തു. ശസ്ത്രക്രിയ ചെയ്ത യുവതികൾ സോഷ്യലിസ്റ്റ് വ്യവസ്ഥയ്ക്ക് തന്നെ ഭീഷണിയാണ് എന്ന് വിചാരണയ്ക്കിടെ പ്രോസിക്യൂട്ടർ ചൂണ്ടിക്കാട്ടി. കിം ജോങ് ഉന്നിന്റെ ഭരണത്തിൻ കീഴിൽ, രാജ്യത്ത് കടുത്ത നിയന്ത്രണങ്ങളാണ് നടപ്പിലാക്കിയിട്ടുള്ളത്. യുവാക്കളുടെ മുടിവെട്ടുന്നതിന് ഉൾപ്പെടെ കർശനമായ നിയമങ്ങൾ നിലവിലുണ്ട്.