ശബരിമലയിൽ പീഠം കാണാതായ സംഭവത്തിൽ ട്വിസ്റ്റ്. പീഠം ദേവസ്വം വിജിലൻസ് കണ്ടെത്തിയത് ഒടുവിൽ പരാതിക്കാരന്റെ ബന്ധുവീട്ടിൽ നിന്നു തന്നെ. ദ്വാരപാലക ശില്പങ്ങളുടെ പീഠമാണ് കണ്ടെത്തിയത്. സ്പോൺസർ ഉണ്ണികൃഷ്ണൻ പോറ്റിയുടെ സഹോദരിയുടെ വെഞ്ഞാറമൂട്ടിലുള്ള വീട്ടിൽ നിന്നാണ് കണ്ടെടുത്തത്. ഈ മാസം പതിമൂന്നിനാണ് പീഠം സഹോദരിയുടെ വീട്ടിലേക്ക് മാറ്റിയത്.
ദേവസ്വത്തെ പ്രതിസ്ഥാനത്ത് നിർത്തി പീഠങ്ങൾ കാണാനില്ലെന്ന് ആദ്യം ആരോപണം ഉന്നയിച്ചത് ഉണ്ണികൃഷ്ണൻ പോറ്റിയാണ്. എന്നാൽ, ഈ പീഠങ്ങൾ ആദ്യം ഉണ്ണികൃഷ്ണൻ പോറ്റിയുടെ ജീവനക്കാരന്റെ വീട്ടിലായിരുന്നു സൂക്ഷിച്ചിരുന്നത്. വിവാദമായതിനെ തുടർന്നാണ് ഇത് ബന്ധുവിന്റെ വീട്ടിലേക്ക് മാറ്റിയത്.
പീഠം കാണാതായതുമായി ബന്ധപ്പെട്ട് ദേവസ്വം വിജിലൻസ് ജോലിക്കാരനെ ചോദ്യം ചെയ്തപ്പോഴാണ് അത് ഉണ്ണികൃഷ്ണൻ പോറ്റിയുടെ വീട്ടിൽ തിരികെ ഏൽപ്പിച്ചിരുന്നതായി വെളിപ്പെടുത്തിയത്.
അതേസമയം, സ്പോൺസറുടെ ബന്ധുവീട്ടിൽ നിന്നും കണ്ടെടുത്ത ദ്വാരപാലക പീഠം ദേവസ്വം വിജിലൻസ് കസ്റ്റഡിയിലെടുത്തു. ഈ പീഠം സ്ട്രോങ്ങ് റൂമിലേക്ക് മാറ്റും, തുടർന്ന് പീഠം കണ്ടെടുത്ത വിവരം ഹൈക്കോടതിയിൽ റിപ്പോർട്ടായി സമർപ്പിക്കും. ഉണ്ണികൃഷ്ണൻ പോറ്റി ഉന്നയിച്ച ആരോപണങ്ങളിൽ ദുരൂഹതയുണ്ടെന്നാണ് വിജിലൻസിന്റെ പ്രാഥമിക വിലയിരുത്തൽ.