റിച്ച്മണ്ട്: റിച്ച്മണ്ട് മലയാളി സംഘടനയായ 'ഗ്രാമം'-ത്തിന്റെ നേതൃത്വത്തിൽ ഈ വർഷത്തെ ഓണാഘോഷവും ഓണസദ്യയും വിപുലമായി സംഘടിപ്പിച്ചു. ടാക്കർ സ്കൂൾ ഓഡിറ്റോറിയത്തിൽ നടന്ന ആഘോഷങ്ങളിൽ ചെണ്ടമേളത്തിന്റെയും താലപ്പൊലിയുടെയും അകമ്പടിയോടെ മാവേലിയെ എഴുന്നള്ളിച്ചുള്ള ഘോഷയാത്ര കാണികൾക്ക് ആവേശമായി.
ഓണാഘോഷത്തിൽ മുഖ്യാതിഥികളായിയെത്തിയ വേൾഡ് മലയാളി കൗൺസിൽ പ്രസിഡന്റ് ഡോ. ബാബു സ്റ്റീഫനും 'ഗ്രാമം' ഭാരവാഹികളും മറ്റു വിശിഷ്ട വ്യക്തികളും ചേർന്ന് നിലവിളക്ക് കൊളുത്തി ആഘോഷങ്ങൾ ഉദ്ഘാടനം ചെയ്തു. ഗ്രാമം പ്രസിഡന്റ് എലിസബത്ത്, സെക്രട്ടറി സജിത്ത്, ട്രഷറർ അരുൺകുമാർ എന്നിവരാണ് പരിപാടികൾക്ക് നേതൃത്വം നൽകിയത്.
കൂടാതെ വൈസ് പ്രസിഡന്റ് മിനി ജോസഫ്, ജോയിന്റ് സെക്രട്ടറി അനൂപ് ചന്ദ്രൻ, ജോയിന്റ് ട്രഷറർ ജോഷി ദേവസ്സി, കൾച്ചറൽ ഡയറക്ടർ ജെമി എബ്രഹാം, ഔട്ട്‌ഡോർ ഡയറക്ടർ നിധിൻ ബെഞ്ചമിൻ, ഡിജിറ്റൽ ആൻഡ് സോഷ്യൽ മീഡിയ കോർഡിനേറ്റർ റോഷൻ ചക്കാലയിൽ, വിമൻസ് ഫോറം ഡയറക്ടർ ജിസ്ന ജേക്കബ്, മെമ്പർഷിപ്പ് ഡയറക്ടർ ശങ്കർ ഗണേശൻ, സേഫ്റ്റി ഡയറക്ടർ ശ്യാം കൃഷ്ണകുമാർ, യൂത്ത് ഫോറം ഡയറക്ടർ റോണ എബ്രഹാം എന്നിവരും നേതൃനിരയിലുണ്ടായിരുന്നു.
ഗ്രാമം പ്രസിഡന്റ് എലിസബത്ത്, ഏവർക്കും ഓണാശംസകൾ നേർന്നുകൊണ്ട് ഈ വർഷത്തെ പ്രവർത്തനങ്ങളെക്കുറിച്ച് സംസാരിച്ചു. കമ്മിറ്റി അംഗങ്ങൾ ചേർന്ന് ഒരുക്കിയ അതിമനോഹരമായ പൂക്കളം ഓണാഘോഷത്തിന് മാറ്റ് കൂട്ടി.
പരിപാടിയിലെ പ്രധാന ആകർഷണങ്ങളിലൊന്നായിരുന്ന വിഭവസമൃദ്ധമായ ഓണസദ്യ, പങ്കെടുത്തവരിൽ ഗൃഹാതുരമായ ഓർമ്മകൾ ഉണർത്തി. സദ്യയിലെ വിഭവങ്ങളിൽ പലതും 'ഗ്രാമം' അംഗങ്ങളുടെ വീടുകളിൽനിന്ന് തയ്യാറാക്കിക്കൊണ്ടുവന്നതാണ്. കൂടാതെ, ദിൽസെ, നമസ്‌തേ എന്നീ പ്രമുഖ കാറ്ററിംഗ് സർവീസുകളാണ് മറ്റ് ചില വിഭവങ്ങൾ ഒരുക്കിയത്.
