ന്യൂയോർക്ക്: നാഷണൽ അസോസിയേഷൻ ഓഫ് ഇന്ത്യൻ നേഴ്സസ് ഓഫ് അമേരിക്ക (NAINA)യുടെ അഞ്ചാമത് ക്ലിനിക്കൽ എക്സലൻസ് ആൻഡ് ലീഡർഷിപ്പ് കോൺഫറൻസ് (CELC) സെപ്റ്റംബർ 19, 20 തീയതികളിൽ ഫിലാഡൽഫിയയിൽ നടന്നു. പെൻസിൽവാനിയ ഇന്ത്യൻ അമേരിക്കൻ നേഴ്സസ് ഓർഗനൈസേഷനായിരുന്നു (PIANO) മുഖ്യ ആതിഥേയർ. " Engage, Educate, Empower "എന്ന ആശയത്തെ അടിസ്ഥാനമാക്കിയാണ് കോൺഫറൻസ് സംഘടിപ്പിച്ചത്. സംഘടനയുടെ ലക്ഷ്യങ്ങളും കൂട്ടായ പ്രവർത്തനങ്ങളിലൂടെ സമൂഹത്തിൽ നടപ്പിലാക്കാവുന്ന നല്ല മാറ്റങ്ങളെക്കുറിച്ചും വേദിയിൽ ചർച്ചയായി.
രണ്ടു ദിവസമായി നടന്ന കോൺഫറൻസിൽ വിവിധ മേഖലകളിൽ നിന്നുള്ള 150-ൽ അധികം നഴ്‌സുമാരും ആരോഗ്യപരിപാലന രംഗത്തെ വിദഗ്ദ്ധരുമാണ് ഒത്തുചേർന്നത്. പ്രഭാഷണങ്ങൾ, വിദഗ്ദ്ധരുടെ പാനൽ ചർച്ചകൾ, നേതൃത്വപാടവം വളർത്തുന്നതിന്റെ പ്രാധാന്യങ്ങളെക്കുറിച്ചുള്ള സെഷനുകൾ എന്നിവ ഇന്ത്യൻ നഴ്സുമാർക്ക് പുതിയ ദിശാബോധം നൽകി. നഴ്സിങ് രംഗത്തെ മികച്ച പ്രവർത്തനങ്ങൾ, നഴ്സുമാരുടെ നേതൃത്വഗുണം വർദ്ധിപ്പിക്കേണ്ടതിൻ്റെ പ്രാധാന്യം, നഴ്സിങ് മേഖലയിലെ നൂതനമായ മാറ്റങ്ങൾ തുടങ്ങിയവയും പ്രധാന വിഷയമായി.
അമേരിക്കയിൽ NAINA യ്ക്ക് 21-ൽ അധികം ഘടകങ്ങളാണുള്ളത്. ഇന്ത്യൻ നഴ്സുമാരെ വെറും തൊഴിലാളികൾ എന്നതിലുപരി നേതൃപദവയിലേക്ക് ഉയർത്തിക്കൊണ്ടുവരാനാണ് സംഘടന ലക്ഷ്യമിടുന്നത്. നഴ്സുമാരുടെ അവകാശങ്ങൾ നേടിയെടുക്കുന്നതിനും, നഴ്സിങ് രംഗത്ത് മികച്ച പ്രവർത്തനങ്ങൾ ചെയ്യുന്നവരെ പ്രോത്സാഹിപ്പിക്കുന്നതിനും, കുടിയേറ്റക്കാരായ നഴ്സുമാർക്ക് സഹായകരമാകുന്ന നയങ്ങൾക്കായി വാദിക്കുന്നതിനും തുടർന്നും പ്രവർത്തിക്കുമെന്ന സന്ദേശമാണ് കോൺഫറൻസ് നൽകിയത്. ഭാവിയിൽ വിദ്യാഭ്യാസം, നേതൃത്വപാടവം വളർത്തൽ, തുല്യതയ്ക്കായി വാദിക്കൽ, അക്കാദമിക്, ക്ലിനിക്കൽ, അന്താരാഷ്ട്ര തലങ്ങളിലുള്ള സഹകരണങ്ങൾ വിപുലീകരിക്കൽ എന്നിവയിൽ നൈന തുടർന്നും ശ്രദ്ധ കേന്ദ്രീകരിക്കുമെന്നും വ്യക്തമാക്കി.