ഇരിങ്ങാലക്കുട: കരുവന്നൂർ ബാങ്കിലെ നിക്ഷേപവുമായി ബന്ധപ്പെട്ട് കേന്ദ്ര സഹമന്ത്രി സുരേഷ് ഗോപിയെ സമീപിച്ചതിന് അവഹേളനം നേരിട്ട പൊറുത്തിശ്ശേരി സ്വദേശി ആനന്ദവല്ലിക്ക് ഒടുവിൽ പണം ലഭിച്ചു. മരുന്ന് വാങ്ങുന്നതിനായി ബാങ്കിൽ അപേക്ഷ നൽകിയിരുന്നു. ആവശ്യപ്പെട്ട തുക ബാങ്ക് അധികൃതർ നൽകിയതായി അവർ മാധ്യമങ്ങളെ അറിയിച്ചു.

തനിക്ക് ആവശ്യമുള്ള പണം കരുവന്നൂർ ബാങ്കിൽ നിന്ന് കിട്ടിയെന്നും, സുരേഷ് ഗോപിയെ കാണാൻ പോകുന്നതിന് പകരം ബാങ്ക് അധികൃതരെ സമീപിച്ചാൽ മതിയായിരുന്നു എന്നും ആനന്ദവല്ലി മാധ്യമങ്ങളോട് പറഞ്ഞു. ഇനിയും ആവശ്യം വരുമ്പോൾ പണം നൽകാമെന്ന് ബാങ്ക് അധികൃതർ ഉറപ്പുനൽകിയിട്ടുണ്ടെന്നും അവർ കൂട്ടിച്ചേർത്തു.

കഴിഞ്ഞ ദിവസമായിരുന്നു സംഭവം. കരുവന്നൂർ സഹകരണ ബാങ്കിൽ നിക്ഷേപിച്ച പണം തിരികെ ലഭിക്കാൻ സഹായം തേടിയ വയോധികയോട്, അത് മുഖ്യമന്ത്രിയോട് ചോദിക്കണമെന്നായിരുന്നു സുരേഷ് ഗോപിയുടെ പ്രതികരണം. നേരത്തെ ഒരു മുതിർന്ന പൗരനിൽ നിന്ന് നിവേദനം സ്വീകരിക്കാൻ വിസമ്മതിച്ച സംഭവത്തിന് പിന്നാലെയാണ് ഈ പുതിയ സംഭവം.

മുഖ്യമന്ത്രിയെ തിരക്കി പോകാൻ തനിക്ക് സാധിക്കുമോ എന്ന് ആ സ്ത്രീ വീണ്ടും ചോദിച്ചപ്പോൾ "എങ്കിൽ എൻ്റെ നെഞ്ചത്തോട്ട് കേറിക്കോ" എന്നായിരുന്നു സുരേഷ് ഗോപിയുടെ മറുപടി. കരുവന്നൂർ ബാങ്കിൽ നിന്ന് ഇ.ഡി. പിടിച്ചെടുത്ത പണം തിരികെ ബാങ്കിൽ നിക്ഷേപിച്ച് ഇടപാടുകാർക്ക് നൽകാൻ മുഖ്യമന്ത്രി തയ്യാറുണ്ടോ എന്നും, ആ പണം സ്വീകരിക്കാൻ മുഖ്യമന്ത്രിയോട് പറയാനും അദ്ദേഹം ആവശ്യപ്പെട്ടു.

സാർ തങ്ങളുടെ മന്ത്രിയല്ലേ എന്നു വയോധിക ചോദിച്ചപ്പോൾ, അല്ലെന്നും ഈ രാജ്യത്തിന്റെ മന്ത്രിയാണെന്നുമാണ് സുരേഷ് ഗോപി മറുപടി നൽകിയത്. മുഖ്യമന്ത്രിയെ കണ്ട് ആ തുക സ്വീകരിക്കാനും, എന്നിട്ട് നിങ്ങൾക്ക് വീതിച്ചു നൽകാനും പറയാനാണ് സുരേഷ് ഗോപി അവരോട് ആവശ്യപ്പെട്ടത്.