കൊടും ക്രൂരമായ അക്രമങ്ങളും ആക്ഷൻ രംഗങ്ങളും കൊണ്ട് ദേശീയ തലത്തിൽ ശ്രദ്ധ നേടിയ ചിത്രമാണ് ഹനീഫ് അദേനി സംവിധാനം ചെയ്ത മാർക്കോ. നടൻ ഉണ്ണിമുകുന്ദൻ കേന്ദ്രകഥാപാത്രത്തെ അവതരിപ്പിച്ച ചിത്രം ഒരു വിഭാഗം പ്രേക്ഷകർ സ്വീകരിക്കുകയും മറ്റൊരു വിഭാഗം എതിർക്കുകയുെ ചെയ്തു. ആക്രമണത്തെ പ്രോത്സാഹിപ്പിക്കുന്ന ഇത്തരം സിനിമകൾ സമൂഹത്തിൽ തെറ്റായ സന്ദേശങ്ങൾ നൽകുമെന്നായിരുന്നു ഒരു കൂട്ടരുടെ വാദം.
വാദപ്രതിവാദങ്ങൾക്കിടയിലും ചിത്രം ബോക്സോഫീസിൽ വമ്പൻ നേട്ടമാണഅ കൊയ്തത്. ഇപ്പോഴിതാ മാർക്കോ ടീമിന്റെ ഔദ്യോഗിക ഇൻസ്റ്റാഗ്രാം പേജ് നടൻ ഉണ്ണി മുകുന്ദനെ അൺഫോളോ ചെയ്തതായാണ് കാണുന്നത്.
ഹനീഫ് അദേനിയുടെ അടുത്ത ചിത്രമായ 'ലോഡ് മാർക്കോ'യുടെ പേര് പുറത്തുവന്നതിന് പിന്നാലെയാണ് ഈ സംഭവം നടന്നതെന്നത് ശ്രദ്ധേയമാണ്. ഹനീഫ് അദേനിയും ക്യൂബ്സ് എന്റർടൈൻമെൻ്റും ഈ ചിത്രത്തിലും ഒരുമിച്ചാണ് പ്രവർത്തിക്കുന്നത്.
കൂടാതെ അടുത്തിടെ മാർക്കോയുടെ പേജ് പൃഥ്വിരാജിനെ ഫോളോ ചെയ്തത് ആരാധകർക്കിടയിൽ ചർച്ചയായിരുന്നു. പിന്നാലെ ടീം മാർക്കോ ഇപ്പോൾ കെജിഎഫ് താരം യാഷിനെയും മോഹൻലാൽ, മമ്മൂട്ടി എന്നിവരെയും ഫോളോ ചെയ്തിട്ടുണ്ട്. ലോർഡ് മാർക്കോ ഉണ്ണി മുകുന്ദന്റെ മാർക്കോയുടെ രണ്ടാം ഭാഗമാണെന്ന് ആദ്യം റൂമറുകളുണ്ടായിരുന്നുവെങ്കിലും നിലവിൽ ചിത്രം പ്രീക്വലോ സ്റ്റാൻഡ്എലോൺ ചിത്രമോ ആവാം എന്ന രീതിയിലാണ് സോഷ്യൽ മീഡിയയിൽ ആരാധകരുടെ ചർച്ചകൾ.
മാർക്കോയിൽ സിദ്ധിഖ് അവതരിപ്പിച്ച ജോർജ് പീറ്റർ എന്ന കഥാപാത്രത്തിന്റെ കുടുംബത്തിലെ തലതൊട്ടപ്പൻ ആയ ലോർഡ് മാർക്കോയുടെ കഥയാണ് ചിത്രം പറയുന്നത് എന്നാണ് റിപ്പോർട്ടുകൾ. മുൻപ് ഒരു ഒരു പോസ്റ്റിന്റെ കമന്റ് ബോക്സിൽ മാർക്കോയുടെ തുടർ ചിത്രങ്ങൾ ചെയ്യാൻ ആഗ്രഹിക്കുന്നില്ല എന്ന് ഉണ്ണി മുകുന്ദൻ പ്രതികരിച്ചിരുന്നു.
എന്നാൽ മോഹൻലാലിനെയും മമ്മൂട്ടിയെയും ടീം മാർക്കോ ഫോളോ ചെയ്തതിന്റെ ഉദ്ദേശം ഇരുവരും ചിത്രത്തിന്റെ ഭാഗമാകുമെന്നതിന്റെ സൂചനയാണോ അല്ലയോ എന്നത് സ്ഥിരീകരിച്ചിട്ടില്ല. യാഷോ, പൃഥ്വിരാജോ, അതോ ഉണ്ണി മുകുന്ദൻ തന്നെയോ ആ വേഷം ചെയ്യാൻ അനുയോജ്യൻ എന്നതിനെ ചൊല്ലി വലിയ തർക്കവും നിലവിൽ സൈബർ സ്‌പേസിൽ നടക്കുന്നുണ്ട്.