ലണ്ടൻ: അമേരിക്കൻ പ്രസിഡന്റ് ഡൊണാൾഡ് ട്രംപും ഭാര്യ മെലീനയും സഞ്ചരിച്ച ഹെലികോപ്റ്റർ സാങ്കേതിക തകരാറിനെ തുടർന്ന് അടിയന്തരമായി നിലത്തിറക്കേണ്ടിവന്നു. ബ്രിട്ടനിലെ ഔദ്യോഗിക സന്ദർശനം പൂർത്തിയാക്കി മടങ്ങുമ്പോഴാണ് സംഭവം. ചെക്കേഴ്സിൽ നിന്ന് ലണ്ടനിലെ സ്റ്റാൻസ്റ്റഡ് വിമാനത്താവളത്തിലേക്ക് പോവുകയായിരുന്നു അവർ.

ട്രംപിന്റെ സ്വകാര്യ ഹെലികോപ്റ്ററായ മറീൻ വണ്ണിനാണ് സാങ്കേതിക പ്രശ്നങ്ങളുണ്ടായത്. തുടർന്ന് മറ്റൊരു ഹെലികോപ്റ്ററിൽ ട്രംപും മെലനിയയും യാത്ര തുടർന്നു. ഹെലികോപ്റ്ററിന്റെ ഹൈഡ്രോളിക് സംവിധാനത്തിൽ ചെറിയ തകരാർ കണ്ടെത്തിയതിനെ തുടർന്ന് മുൻകരുതലെന്ന നിലയിലാണ് അടിയന്തര ലാൻഡിങ് നടത്തിയതെന്ന് വൈറ്റ് ഹൗസ് പ്രസ് സെക്രട്ടറി കാരലിൻ ലീവിറ്റ് അറിയിച്ചു.

സ്റ്റാൻസ്റ്റഡ് വിമാനത്താവളത്തിൽ എത്തുന്നതിന് മുമ്പ് പൈലറ്റുമാർ ഹെലികോപ്റ്റർ ഒരു പ്രാദേശിക എയർഫീൽഡിൽ ഇറക്കുകയായിരുന്നു. ഹെലികോപ്റ്ററിന് തകരാർ സംഭവിച്ചതിനാൽ 20 മിനിറ്റ് വൈകിയാണ് ട്രംപ് സ്റ്റാൻസ്റ്റഡ് വിമാനത്താവളത്തിലെത്തിയത്. തുടർന്ന്, അദ്ദേഹം തന്റെ ഔദ്യോഗിക വിമാനമായ എയർഫോഴ്‌സ് വണ്ണിൽ യു.എസിലേക്ക് മടങ്ങി.