ഒടിഞ്ഞ എല്ലുകൾ ഇനി ഞൊടിയിടയിൽ ഒട്ടിക്കാം. ഇതിന് സഹായിക്കുന്ന ബോൺ ഗ്ലൂ എന്ന പുതിയ കണ്ടുപിടുത്തവുമായി ചൈനീസ് ഗവേഷകർ. 'ബോൺ 02' എന്ന് പേരിട്ടിട്ടുള്ള ഈ ഉത്പന്നം, കിഴക്കൻ ചൈനയിലെ സെജിയാങ് പ്രവിശ്യയിലെ ഒരു ഗവേഷണ സംഘമാണ് വികസിപ്പിച്ചത്. വെറും മൂന്ന് മിനിറ്റിനുള്ളിൽ എല്ലുകൾ കൂട്ടിചേർക്കാൻ ഇതിന് സാധിക്കും.
ഈ കണ്ടുപിടുത്തത്തിന് പ്രചോദനമായത് വെള്ളത്തിനടിയിൽ പാലത്തിൽ പറ്റിപ്പിടിച്ചിരിക്കുന്ന മുത്തുച്ചിപ്പികൾ ആയിരുന്നുവെന്ന് ഗവേഷകർ പറയുന്നു. രക്തം നിറഞ്ഞ സാഹചര്യങ്ങളിൽ പോലും ഈ പശ ഫലപ്രദമായി പ്രവർത്തിക്കുമെന്നും ഗവേഷകർ അവകാശപ്പെടുന്നു. എല്ലുകൾക്ക് പൂർവസ്ഥിതി ലഭിക്കുമ്പോൾ, പശ ശരീരത്തിലേക്ക് സ്വാഭാവികമായി അലിഞ്ഞുചേരും.
നിലവിൽ ഒടിഞ്ഞ എല്ലുകൾക്ക് ഉപയോഗിക്കുന്ന കമ്പികളും സ്ക്രൂകളും ശസ്ത്രക്രിയയിലൂടെ നീക്കം ചെയ്യേണ്ടി വരാറുണ്ട്. എന്നാൽ, ഈ ബോൺ ഗ്ലൂ ഉപയോഗിക്കുന്നതിലൂടെ അത്തരം സർജറികൾ ഒഴിവാക്കാൻ സാധിക്കുമെന്നത് ഈ കണ്ടുപിടുത്തത്തിന്റെ പ്രധാന നേട്ടമാണ്. മെഡിക്കൽ രംഗത്ത് ഒരു വലിയ മാറ്റത്തിന് ഇത് വഴിയൊരുക്കുമെന്നാണ് പ്രതീക്ഷ.
ബോണ്‍ 02 സുരക്ഷയും ഫലപ്രാപ്തിയും നല്‍കുന്നതായി ലാബ് ടെസ്റ്റുകള്‍ വ്യക്തമാക്കുന്നു. ഒരു പരീക്ഷണത്തില്‍ 180 സെക്കന്‍ഡിനുള്ളില്‍ എല്ലുകള്‍ ഒട്ടിയതായി കണ്ടെത്തി. എല്ലിന് പൊട്ടലുണ്ടാകുന്ന കേസുകളില്‍ പരമ്പരാഗത രീതിയിലുള്ള ചികിത്സകള്‍ക്ക് വലിയ സര്‍ജറികളും സ്റ്റീലില്‍ നിര്‍മിച്ച കമ്പനികളും സ്‌ക്രൂവുകളും ഘടിപ്പിക്കേണ്ടതായും വരും. എന്നാല്‍ 150 പേരില്‍ ബോണ്‍ ഗ്ലൂ വിജയകരമായി പരീക്ഷിച്ചതായി റിപ്പോര്‍ട്ടുകള്‍ വ്യക്തമാക്കി.
ബോണ്‍ ഗ്ലൂ ഉപയോഗിച്ച് ഒട്ടിച്ച അസ്ഥികള്‍ക്ക് പരമാവധി 400 പൗണ്ടിലധികം ബോണ്ടിംഗ് ബലവും ഏകദേശം 0.5എംപിഎ ശക്തിയും(Shear strength) 10 എംപിഎ കംപ്രസീവ് ശക്തിയും ഉള്ളതായി തിരിച്ചറിഞ്ഞു. ഇത് പരമ്പരാഗത ലോക ഇംപ്ലാന്റുകള്‍ക്ക് പകരമായി ഇത് ഉപയോഗിക്കാന്‍ കഴിയുമെന്ന് എടുത്തുകാണിക്കുന്നു. കൂടാതെ, ശരീരം ഇതിനെതിരേ പ്രതികരിക്കാനുള്ള സാധ്യത കുറവാണെന്നും അണുബാധകള്‍ പോലെയുള്ള അപകടസാധ്യതകള്‍ കുറയ്ക്കാന്‍ ഈ പശയ്ക്ക് കഴിയുമെന്നും ഗവേഷകര് അവകാശപ്പെട്ടു.