കലുങ്ക് സഭയിൽ സഹായം തേടിയെത്തിയ വയോധികയോട് കേന്ദ്ര സഹമന്ത്രിയായ സുരേഷ് ഗോപി മോശമായി പെരുമാറിയെന്ന് ആരോപണം. കരുവന്നൂർ സഹകരണ ബാങ്കിൽ നിക്ഷേപിച്ച പണം തിരികെ ലഭിക്കാൻ സഹായം തേടിയ വയോധികയോട്, അത് മുഖ്യമന്ത്രിയോട് ചോദിക്കണമെന്നായിരുന്നു സുരേഷ് ഗോപിയുടെ പ്രതികരണം. നേരത്തെ ഒരു മുതിർന്ന പൗരനിൽ നിന്ന് നിവേദനം സ്വീകരിക്കാൻ വിസമ്മതിച്ച സംഭവത്തിന് പിന്നാലെയാണ് ഈ പുതിയ സംഭവം.

മുഖ്യമന്ത്രിയെ തിരക്കി പോകാൻ തനിക്ക് സാധിക്കുമോ എന്ന് ആ സ്ത്രീ വീണ്ടും ചോദിച്ചപ്പോൾ "എങ്കിൽ എൻ്റെ നെഞ്ചത്തോട്ട് കേറിക്കോ" എന്നായിരുന്നു സുരേഷ് ഗോപിയുടെ മറുപടി. കരുവന്നൂർ ബാങ്കിൽ നിന്ന് ഇ.ഡി. പിടിച്ചെടുത്ത പണം തിരികെ ബാങ്കിൽ നിക്ഷേപിച്ച് ഇടപാടുകാർക്ക് നൽകാൻ മുഖ്യമന്ത്രി തയ്യാറുണ്ടോ എന്നും, ആ പണം സ്വീകരിക്കാൻ മുഖ്യമന്ത്രിയോട് പറയാനും അദ്ദേഹം ആവശ്യപ്പെട്ടു.

സാർ തങ്ങളുടെ മന്ത്രിയല്ലേ എന്നു വയോധിക ചോദിച്ചപ്പോൾ, അല്ലെന്നും ഈ രാജ്യത്തിന്റെ മന്ത്രിയാണെന്നുമാണ് സുരേഷ് ഗോപി മറുപടി നൽകിയത്. മുഖ്യമന്ത്രിയെ കണ്ട് ആ തുക സ്വീകരിക്കാനും, എന്നിട്ട് നിങ്ങൾക്ക് വീതിച്ചു നൽകാനും പറയാനാണ് സുരേഷ് ഗോപി അവരോട് ആവശ്യപ്പെട്ടത്. ഈ മറുപടി കേട്ട് വിഷമിച്ച് തലകുനിച്ച് നിൽക്കുന്ന വയോധിക ദൃശ്യങ്ങളിലുണ്ട്. കഴിഞ്ഞ ദിവസം തൃശ്ശൂർ ചേര്‍പ്പിലെ ഒരു കലുങ്ക് സംവാദത്തിനിടെ മുതിർന്ന പൗരന്റെ അപേക്ഷ നിരസിച്ചത് ഒരു കൈപ്പിഴയാണെന്ന് സുരേഷ് ഗോപി പരസ്യമായി പറഞ്ഞിരുന്നു. എന്നിട്ടും വീണ്ടും ഇത് ആവർത്തിക്കപ്പെടുന്നത് അദ്ദേഹത്തിന്റെ മാടമ്പിത്തരമാണെന്നാണ് ഉയരുന്ന വിമർശനം.