കോഴിക്കോട്: പമ്പയിൽ ശനിയാഴ്ച നടക്കാനിരിക്കുന്ന ആഗോള അയ്യപ്പ സംഗമത്തിനെതിരെ ഹിന്ദു ഐക്യവേദി നേതാവ് കെ.പി. ശശികല രംഗത്ത്. മുഖ്യമന്ത്രിയുൾപ്പെടെയുള്ളവർക്കായി പമ്പയിലെ ശബരിമല മരാമത്ത് ഓഫീസിൽ 'മണിയറ' ഒരുക്കിയിട്ടുണ്ടെന്ന് അവർ ഫേസ്ബുക്ക് കുറിപ്പിലൂടെ പരിഹസിച്ചു. ഈ സംഗമം ഗംഭീരമാക്കാൻ മദ്യവും കോഴിക്കാലും ഒപ്പം പെണ്ണുമുണ്ടോ എന്നും ശശികല ചോദ്യമുയർത്തി.

അതേസമയം ശനിയാഴ്ച രാവിലെ 8 മണിക്ക് രജിസ്ട്രേഷനോടുകൂടി ആരംഭിക്കുന്ന ആഗോള അയ്യപ്പ സംഗമം വൈകീട്ട് 3.50-ന് നടക്കുന്ന സമാപന സമ്മേളനത്തോടെ അവസാനിക്കും. രാവിലെ 9 മണിക്ക് പരമ്പരാഗത വാദ്യമേളങ്ങൾ അരങ്ങേറും. തുടർന്ന് 10.35-ന് മുഖ്യമന്ത്രി പിണറായി വിജയൻ സംഗമം ഉദ്ഘാടനം ചെയ്യും. ഉദ്ഘാടനത്തിനുശേഷം സമീപനരേഖയുടെ അവതരണത്തോടെ ചർച്ചകൾ ആരംഭിക്കും.

ആഗോള അയ്യപ്പ സംഗമത്തിൽ ശബരിമല മാസ്റ്റർ പ്ലാൻ, സ്പിരിച്വൽ ടൂറിസം, തിരക്ക് നിയന്ത്രിക്കാനുള്ള മാർഗ്ഗങ്ങൾ എന്നീ മൂന്ന് വിഷയങ്ങളാണ് പ്രധാനമായും ചർച്ച ചെയ്യുന്നത്. ആചാരാനുഷ്ഠാനങ്ങളോ സ്ത്രീപ്രവേശനമോ പോലുള്ള വിഷയങ്ങൾ ചർച്ചയിൽ നിന്ന് ഒഴിവാക്കും.

പ്രധാന വേദിയിലാണ് മാസ്റ്റർ പ്ലാനിനെക്കുറിച്ചുള്ള ചർച്ചകൾ നടക്കുന്നത്. ശബരിമലയുടെ സുസ്ഥിര വികസനവും, മാസ്റ്റർ പ്ലാനിനായി ആവശ്യമുള്ള 1072 കോടി രൂപ കണ്ടെത്തുന്നതുൾപ്പെടെയുള്ള കാര്യങ്ങൾ ചർച്ച ചെയ്യും. ഓരോ പാനലിസ്റ്റിനും 15 മിനിറ്റ് സമയം അനുവദിച്ചിട്ടുണ്ട്.

രണ്ടാം ആത്മീയ ടൂറിസം സാധ്യതകളെ ആഗോള ടൂറിസവുമായി എങ്ങനെ ബന്ധിപ്പിക്കാമെന്ന് ചർച്ച ചെയ്യും. മൂന്നാം വേദയിൽ തീർത്ഥാടകർക്ക് തിരക്കില്ലാതെ ദർശനം പൂർത്തിയാക്കാൻ സാധിക്കുന്ന ക്രമീകരണങ്ങളെക്കുറിച്ചും, അതിനുവേണ്ടുന്ന മുന്നൊരുക്കങ്ങളെക്കുറിച്ചും ചർച്ച നടക്കും.