തിരുവനന്തപുരം: മുത്തശിയുടെ അപകട ഇൻഷുറൻസ് തുകയ്ക്കായി മുത്തച്ഛനെ കുത്തിക്കൊന്ന കേസിൽ ചെറുമകൻ അറസ്റ്റിൽ. ഇടിഞ്ഞാർ മൈലാടുംകുന്നിൽ ഇന്നലെ വൈകീട്ട് 5.30-ഓടെയാണ് സംഭവം നടന്നത്. മൈലാടുംകുന്നിൽ രാജേന്ദ്രൻ കാണി (58) ആണ് കൊല്ലപ്പെട്ടത്. ഇയാളുടെ മകളുടെ മകനായ സന്ദീപ് (25) ആണ് പിടിയിലായത്. നേരത്തെയും വിവിധ കേസുകളിൽ പ്രതിയായിട്ടുള്ള ആളാണ് സന്ദീപെന്ന് പോലീസ് അറിയിച്ചു.

ഒരു വർഷം മുൻപാണ് രാജേന്ദ്രൻ കാണിയുടെ ഭാര്യ വാഹനാപകടത്തിൽ മരിച്ചത്. ഇതിന്റെ നഷ്ടപരിഹാരത്തുക രാജേന്ദ്രൻ കാണിക്ക് നൽകാൻ കോടതി വിധിച്ചിരുന്നു. ഈ തുക ലഭിക്കുന്നതിനായി സന്ദീപ് മുത്തച്ഛനെ നിരന്തരം നിർബന്ധിക്കാറുണ്ടായിരുന്നു. സന്ദീപിന്റെ ശല്യം സഹിക്കാതെ വന്നപ്പോൾ രാജേന്ദ്രൻ കാണി ഇടിഞ്ഞാറിലെ ഒരു മുറിയിലേക്ക് താമസം മാറ്റി. എന്നാൽ ഇവിടെയെത്തിയും പ്രതി പണത്തിനുവേണ്ടി ശല്യം തുടർന്നു.

ഇന്നലെ രാവിലെ ക്ഷേത്രം തുറക്കാനെത്തിയ രാജേന്ദ്രൻ കാണിയെ സന്ദീപ് കുത്തുകയായിരുന്നു. അടുത്തുള്ള കടയിലേക്ക് ഓടിക്കയറിയെങ്കിലും പിന്നാലെയെത്തിയ പ്രതി കടയ്ക്ക് പുറത്തിട്ട് വീണ്ടും കുത്തി. ഗുരുതരമായി പരിക്കേറ്റ രാജേന്ദ്രൻ കാണിയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. നാട്ടുകാർ തടഞ്ഞുവച്ചാണ് സന്ദീപിനെ പോലീസിന് കൈമാറിയത്.