വാഷിംഗ്ടൺ: റഷ്യയിൽ നിന്ന് എണ്ണ വാങ്ങുന്നതിന് ഇന്ത്യയ്ക്ക് മേൽ അധിക തീരുവ ചുമത്തുന്നത് എളുപ്പമുള്ള കാര്യമല്ലെന്ന് യു.എസ്. പ്രസിഡന്റ് ഡൊണാൾഡ് ട്രംപ്. ഇത് ഇന്ത്യയും അമേരിക്കയും തമ്മിലുള്ള ബന്ധത്തിൽ വിള്ളൽ വീഴ്ത്താൻ സാധ്യതയുണ്ടെന്നും അദ്ദേഹം പറഞ്ഞു. ഒരു മാധ്യമത്തിന് നൽകിയ അഭിമുഖത്തിലാണ് ട്രംപിന്റെ പ്രതികരണം.

"നോക്കൂ, ഇന്ത്യയായിരുന്നു റഷ്യയുടെ ഏറ്റവും വലിയ ഉപഭോക്താവ്. അതുകൊണ്ടാണ് ഞാൻ 50% തീരുവ ഏർപ്പെടുത്തിയത്. അത് ചെയ്യാൻ എളുപ്പമല്ല, കാരണം അത് ഇന്ത്യയുമായുള്ള ബന്ധത്തിൽ വിള്ളലുണ്ടാക്കും," റഷ്യക്കെതിരെ യു.എസ്. സ്വീകരിക്കുന്ന നടപടികളെക്കുറിച്ച് ചോദിച്ചപ്പോൾ ട്രംപ് പറഞ്ഞു.

തന്റെ ഭരണകാലത്ത് നിരവധി ആഗോള സംഘർഷങ്ങൾ പരിഹരിച്ചതായും അദ്ദേഹം അവകാശപ്പെട്ടു. "ഏഴ് യുദ്ധങ്ങൾ ഞാൻ പരിഹരിച്ചു. പാകിസ്ഥാൻ, ഇന്ത്യ എന്നിവയുൾപ്പെടെ പരിഹരിക്കാനാവാത്തതെന്ന് കരുതിയ ചില വലിയ സംഘർഷങ്ങളും ഞാൻ പരിഹരിച്ചു. കോംഗോ, റുവാണ്ട എന്നിവിടങ്ങളിലെ 31 വർഷം നീണ്ട യുദ്ധം ഞാൻ അവസാനിപ്പിച്ചു, ദശലക്ഷക്കണക്കിന് ആളുകൾ കൊല്ലപ്പെട്ട ആ യുദ്ധം പരിഹരിക്കാനാവാത്തതായിരുന്നു," ട്രംപ് കൂട്ടിച്ചേർത്തു.

അതേസമയം, രാജ്യത്തിന്റെ താൽപ്പര്യങ്ങൾക്കും വിപണിയുടെ ആവശ്യകതകൾക്കും അനുസരിച്ചാണ് തങ്ങളുടെ ഊർജ്ജ സംഭരണം നടത്തുന്നതെന്ന് പറഞ്ഞുകൊണ്ട് ഇന്ത്യ റഷ്യൻ എണ്ണ വാങ്ങലിനെ ന്യായീകരിച്ചു.

നേരത്തെ, ഇന്ത്യയിലെ അടുത്ത അംബാസഡറായി ട്രംപ് നിർദ്ദേശിച്ച സെർജിയോ ഗോർ, യു.എസിനെക്കാൾ വലിയ മധ്യവർഗ്ഗ വിപണിയുള്ള ഇന്ത്യ അമേരിക്കയിൽ നിന്ന് കൂടുതൽ ക്രൂഡ് ഓയിലും എണ്ണ ഉത്പന്നങ്ങളും വാങ്ങാൻ ട്രംപ് ഭരണകൂടം ആഗ്രഹിക്കുന്നുണ്ടെന്ന് വ്യക്തമാക്കിയിരുന്നു. ഇതിനായുള്ള വ്യാപാര ചർച്ചകൾ നടക്കുന്നുണ്ടെന്നും അദ്ദേഹം സൂചിപ്പിച്ചു.