കാഠ്മണ്ഡു: അഴിമതിയിലും സ്വജനപക്ഷപാതത്തിലും പ്രതിഷേധിച്ചുള്ള പ്രക്ഷോഭങ്ങളെത്തുടർന്ന് സർക്കാർ രാജിവെച്ചതിന് പിന്നാലെ, നേപ്പാളിന്റെ ഇടക്കാല മേധാവിയായി മുൻ ചീഫ് ജസ്റ്റിസ് സുശീല കാർക്കിയെ നിയമിച്ചു. നേപ്പാളിന്റെ ചരിത്രത്തിലെ ആദ്യത്തെ വനിതാ ചീഫ് ജസ്റ്റിസായ സുശീല, പുതിയ തിരഞ്ഞെടുപ്പ് നടക്കുന്നതുവരെ രാജ്യത്തെ നയിക്കും.
പ്രക്ഷോഭങ്ങൾക്ക് നേതൃത്വം നൽകിയ യുവജനങ്ങളുടെ കൂട്ടായ്മയായ 'ജെൻ സി' പ്രസ്ഥാനത്തിന്റെ ഓൺലൈൻ യോഗത്തിലാണ് സുശീല കാർക്കിയെ തിരഞ്ഞെടുക്കാൻ തീരുമാനമെടുത്തത്. നിലവിലെ പ്രതിസന്ധി മറികടക്കാൻ അവരെ പിന്തുണയ്ക്കാൻ സംഘടന ഏകകണ്ഠമായി തീരുമാനിക്കുകയായിരുന്നു.
ഈ പദവി ഏറ്റെടുക്കാൻ താൻ തയ്യാറാണെന്ന് സുശീല കാർക്കി വ്യക്തമാക്കി. “സമീപകാല പ്രക്ഷോഭങ്ങൾക്ക് നേതൃത്വം നൽകിയത് ജെൻ സി ഗ്രൂപ്പാണ്. ഒരു ചെറിയ കാലയളവിലേക്ക് സർക്കാരിനെ നയിക്കാൻ അവർ എന്നെ വിശ്വസിച്ചു,” സിഎൻഎൻ-ന്യൂസ് 18-ന് നൽകിയ അഭിമുഖത്തിൽ അവർ പറഞ്ഞു. പ്രതിഷേധത്തിനിടെ ജീവൻ നഷ്ടപ്പെട്ടവരുടെ കുടുംബങ്ങളെ ആദരിക്കുകയും പിന്തുണയ്ക്കുകയും ചെയ്യുക എന്നതാണ് തന്റെ അടിയന്തര മുൻഗണനയെന്നും അവർ അറിയിച്ചു.
പ്രസ്ഥാനത്തിലെ യുവ അംഗങ്ങൾ തന്റെ പേരിന് അനുകൂലമായി വോട്ട് ചെയ്തതായി സുശീല കാർക്കി സ്ഥിരീകരിച്ചു. "ഇടക്കാല സർക്കാരിനെ നയിക്കാനുള്ള അവരുടെ അഭ്യർത്ഥന ഞാൻ സ്വീകരിച്ചു," അവർ പറഞ്ഞു. നേപ്പാളിന്റെ രാഷ്ട്രീയ ചരിത്രത്തിൽ ഇപ്പോഴത്തെ സാഹചര്യം വളരെ ദുഷ്കരമാണെന്ന് അവർ സമ്മതിച്ചു. "മുൻകാലങ്ങളിലും നേപ്പാളിൽ പ്രശ്‌നങ്ങളുണ്ടായിരുന്നു. എന്നാൽ ഇപ്പോൾ സ്ഥിതി കൂടുതൽ ബുദ്ധിമുട്ടാണ്," അവർ കൂട്ടിച്ചേർത്തു.