രാഹുൽ ഗാന്ധിയുടെ "വോട്ട് മോഷണം" (വോട്ട് ചോരി) ആരോപണങ്ങളിൽ വിശദീകരണം തേടിക്കൊണ്ട് സമർപ്പിച്ച പൊതുതാൽപര്യ ഹർജി മദ്രാസ് ഹൈക്കോടതി തള്ളി. ഹർജി പൂർണ്ണമായും തെറ്റിദ്ധാരണകളെ അടിസ്ഥാനമാക്കിയുള്ളതാണെന്ന് കോടതി നിരീക്ഷിച്ചു.
ഹർജിയിൽ മതിയായ വിശദാംശങ്ങളോ തെളിവുകളോ ഇല്ലാത്തതിനാൽ, തിരഞ്ഞെടുപ്പ് കമ്മീഷനോട് (ഇസിഐ) വിശദീകരണം ആവശ്യപ്പെടാൻ കഴിയില്ലെന്ന് കോടതി വ്യക്തമാക്കി. ഈ ഹർജി രാഷ്ട്രീയപരമായ ആരോപണങ്ങളെ മാത്രം അടിസ്ഥാനമാക്കിയുള്ളതാണെന്നും ബെഞ്ച് ചൂണ്ടിക്കാട്ടി.
ഹർജിക്കാരന് ഒരു ലക്ഷം രൂപ പിഴ ചുമത്തിയ കോടതി, ഈ തുക തമിഴ്‌നാട് സംസ്ഥാന ലീഗൽ സർവീസസ് അതോറിറ്റിക്ക് നൽകണമെന്നും ഉത്തരവിട്ടു. ഹർജി തള്ളിയത് ആരോപണങ്ങളെക്കുറിച്ചുള്ള കോടതിയുടെ അഭിപ്രായമായി കണക്കാക്കരുതെന്നും, വിഷയത്തിൽ സ്വന്തം നിലയ്ക്ക് തീരുമാനമെടുക്കാൻ ഇലക്ഷൻ കമ്മീഷന് സ്വാതന്ത്ര്യമുണ്ടെന്നും കോടതി കൂട്ടിച്ചേർത്തു.
ലോക്‌സഭാ തിരഞ്ഞെടുപ്പിലും കർണാടക, മഹാരാഷ്ട്ര, ഹരിയാന നിയമസഭാ തിരഞ്ഞെടുപ്പുകളിലും വോട്ടർപട്ടികയിൽ ക്രമക്കേടുകൾ നടത്തി ബിജെപി വോട്ട് മോഷ്ടിച്ചുവെന്നാണ് രാഹുൽ ഗാന്ധി ആരോപിച്ചത്. ഇതിന് തിരഞ്ഞെടുപ്പ് കമ്മീഷന്റെ ഒത്താശയുണ്ടായിരുന്നെന്നും അദ്ദേഹം ഡൽഹിയിൽ നടത്തിയ വാർത്താസമ്മേളനത്തിൽ ആരോപിച്ചിരുന്നു.