തിരുവനന്തപുരം: യൂത്ത് കോൺഗ്രസ് നേതാവ് രാഹുൽ മാങ്കൂട്ടത്തിലിനെതിരായ ലൈംഗിക ആരോപണക്കേസിൽ അന്വേഷണം പ്രതിസന്ധിയിൽ. നിയമനടപടികളുമായി മുന്നോട്ട് പോകാൻ താൽപര്യമില്ലെന്ന് ഇരകൾ ക്രൈംബ്രാഞ്ച് അന്വേഷണ സംഘത്തെ അറിയിച്ചതാണ് ഇതിന് കാരണം.

സംസ്ഥാന പോലീസ് മേധാവിക്ക് ലഭിച്ച ആറ് പരാതികളിലായിരുന്നു ക്രൈംബ്രാഞ്ച് അന്വേഷണം ആരംഭിച്ചത്. പരാതിക്കാരായ യുവതികളിൽ നിന്ന് നേരിട്ട് മൊഴിയെടുക്കാൻ അന്വേഷണ സംഘത്തിന് കഴിഞ്ഞിട്ടില്ല. അന്വേഷണ ഉദ്യോഗസ്ഥർ ശേഖരിച്ച വിവരങ്ങളിൽനിന്ന് കാര്യമായ തെളിവുകളൊന്നും ലഭിക്കാത്തതിനെ തുടർന്ന് ഇവർ വീണ്ടും ഇരകളെ സമീപിച്ചു. എന്നാൽ, മൊഴി നൽകാൻ തയാറല്ലെന്ന് ഇവർ നിലപാട് എടുത്തു.

ഗർഭഛിദ്രത്തിന് ഭീഷണിപ്പെടുത്തിയതായുള്ള ശബ്ദരേഖകളും ചാറ്റുകളും അന്വേഷണ സംഘത്തിന് ലഭിച്ചിരുന്നു. ഇത് കൂടാതെ, ഗർഭഛിദ്രത്തിന് തെളിവ് തേടി കേരളത്തിന് പുറത്തേക്കും അന്വേഷണം വ്യാപിപ്പിച്ചിരുന്നു. എങ്കിലും ഫലമുണ്ടായില്ല. കേസുമായി മുന്നോട്ട് പോകാൻ ഇരകൾ വിസമ്മതിച്ച സാഹചര്യത്തിൽ തുടർനടപടികൾ സംബന്ധിച്ച് ഉന്നത പോലീസ് ഉദ്യോഗസ്ഥരുമായി ആലോചിച്ച ശേഷം തീരുമാനമെടുക്കുമെന്ന് ക്രൈംബ്രാഞ്ച് അറിയിച്ചു. നിലവിൽ, പരാതി നൽകിയവരുടെയും യുവതികളുമായി സംസാരിച്ചവരുടെയും മൊഴികൾ മാത്രമാണ് രേഖപ്പെടുത്തിയിട്ടുള്ളത്.

തിരുവനന്തപുരം ജുഡീഷ്യൽ ഫസ്റ്റ്ക്ലാസ് മജിസ്ട്രേറ്റ് കോടതിയിൽ ക്രൈംബ്രാഞ്ച് എഫ്ഐആർ സമർപ്പിച്ചിരുന്നു. സ്ത്രീകളെ സാമൂഹിക മാധ്യമങ്ങളിലൂടെ പിന്തുടർന്ന് ശല്യം ചെയ്യുക, ഫോണിൽ ഭീഷണിപ്പെടുത്തുക, ഗർഭഛിദ്രത്തിന് നിർബന്ധിച്ച് സന്ദേശങ്ങൾ അയയ്ക്കുക തുടങ്ങിയ കുറ്റങ്ങളാണ് എഫ്ഐആറിൽ രേഖപ്പെടുത്തിയിരിക്കുന്നത്.