കാസർ​ഗോഡ്: നാല് മാസം മുൻപ് വിവാഹിതയായ 21 വയസ്സുകാരി ഭർതൃവീട്ടിൽ തൂങ്ങിമരിച്ചു. മേൽപ്പറമ്പ് അരമങ്ങാനം ആലിങ്കാൽ തൊട്ടിയിൽ വീട്ടിൽ രഞ്ജേഷിന്റെ ഭാര്യയായ കെ. നന്ദനയാണ് മരിച്ചത്. ഞായറാഴ്ച ഉച്ചയോടെ നന്ദനയെ കിടപ്പുമുറിയിൽ മരിച്ച നിലയിൽ കണ്ടെത്തുകയായിരുന്നു. മരണത്തിന് തൊട്ടുമുമ്പ് താൻ മരിക്കാൻ പോവുകയാണെന്ന് നന്ദന അമ്മയ്ക്ക് സന്ദേശമയച്ചിരുന്നു.

പെരിയ ആയംപാറ വില്ലാരംപെതി സ്വദേശികളായ കെ. രവിയുടെയും സീനയുടെയും ഏകമകളാണ് നന്ദന. പ്രണയത്തിലായിരുന്ന നന്ദനയും രഞ്ജേഷും കഴിഞ്ഞ ഏപ്രിൽ 26-നാണ് വിവാഹിതരായത്.

ഞായറാഴ്ച രാവിലെ നന്ദന അമ്മയ്ക്ക് സന്ദേശമയച്ചതിനെ തുടർന്ന്, നന്ദനയുടെ വീട്ടുകാർ ഉടൻ തന്നെ രഞ്ജേഷിന്റെ വീട്ടുകാരെ വിവരം അറിയിക്കുകയായിരുന്നു. തുടർന്ന് നടത്തിയ അന്വേഷണത്തിലാണ് നന്ദനയെ മുറിയിൽ തൂങ്ങിയ നിലയിൽ കണ്ടെത്തിയത്. മുറി അകത്തുനിന്ന് പൂട്ടിയ നിലയിലായിരുന്നതിനാൽ വാതിൽ പൊളിച്ചാണ് വീട്ടുകാർ അകത്തുകയറിയത്.