തിരുവനന്തപുരം: ലൈംഗികാരോപണങ്ങൾ നേരിടുന്ന പാലക്കാട് എം.എൽ.എ. രാഹുൽ മാങ്കൂട്ടത്തിൽ എം.എൽ.എ. സ്ഥാനം രാജിവെക്കില്ല. രാജിവെച്ചാൽ ഉപതിരഞ്ഞെടുപ്പിന് സാധ്യതയുണ്ടെന്ന നിയമോപദേശത്തിന്റെ അടിസ്ഥാനത്തിലാണ് ഈ തീരുമാനം. ഉപതിരഞ്ഞെടുപ്പ് ഒഴിവാക്കാനുള്ള കോൺഗ്രസ് തീരുമാനത്തിന്റെ ഭാഗമായാണ് ഈ നീക്കം.

അതേസമയം, രാഹുലിനെതിരെ കടുത്ത നടപടി സ്വീകരിക്കാൻ പാർട്ടി തീരുമാനിച്ചതായാണ് സൂചന. അദ്ദേഹത്തെ പാർട്ടിയിൽനിന്ന് സസ്പെൻഡ് ചെയ്യാനും പാർലമെന്ററി പാർട്ടിയിൽനിന്ന് മാറ്റിനിർത്താനും സാധ്യതയുണ്ട്. നിയമസഭാ നടപടികളിൽനിന്ന് അദ്ദേഹത്തിന് അവസരം നൽകാതെ മാറ്റിനിർത്താനും സാധ്യതയുണ്ട്. സെപ്റ്റംബർ 15-ന് ആരംഭിക്കുന്ന നിയമസഭാ സമ്മേളനത്തിൽ രാഹുൽ അവധിയെടുക്കാൻ സാധ്യതയുണ്ടെന്നും റിപ്പോർട്ടുകളുണ്ട്.

രാഹുൽ മാങ്കൂട്ടത്തിലനെ തള്ളി ഉമ തോമസ് എംഎൽഎ. വരുന്ന ആരോപണങ്ങളിൽ രാഹുൽ ഇത് വരെ മാനനഷ്ടക്കേസ് നൽകിയിട്ടില്ല. അതിനർത്ഥം ഇതൊക്കെ ചെയ്തുവെന്നല്ലേയെന്ന് ഉമ തോമസ്. രാഹുൽ മാങ്കൂട്ടത്തിൽ എംഎൽഎ സ്ഥാനമൊഴിയണമെന്ന് ഉമ ആവശ്യപ്പെട്ടു. ധാർമികമായ ഉത്തരവാദിത്തം രാഹുലിനുണ്ടെന്നും ഉമ തോമസ് പറഞ്ഞു. ആരോപണങ്ങൾ ഒന്നിനുപുറകെ ഒന്നായി ഉയരുന്ന സാഹചര്യത്തിൽ രാജി വെച്ച് മാറിനിൽക്കണമെന്നും ഉമ കൂട്ടിച്ചേർത്തു.