മകൻ മാധവ് സുരേഷും(Madhav Suresh) കോൺഗ്രസ് നേതാവും തമ്മിൽ നടുറോഡിൽ നിന്ന് ഏറ്റുമുട്ടിയ സംഭവത്തിൽ മാധ്യമങ്ങളുടെ ചോദ്യത്തിന് മുന്നിൽ വ്യക്തമായ മറുപടി നൽകാതെ ഒഴിഞ്ഞുമാറി നടനും കേന്ദ്രമന്ത്രിയുമായ സുരേഷ് ഗോപി(Suresh Gopi). ഞാനെന്തു പാപമാണ് നിങ്ങളോടൊക്കെ ചെയ്തത് എന്നും. നിങ്ങൾ എന്റെ ജീവിതത്തിൽ ആണ് കയറിക്കൊത്തിയത്. എനിക്കൊരു കുടുംബമുണ്ട് ഞാനൊരു അച്ഛനാണ് എനിക്ക് മക്കളുണ്ട് എന്നെല്ലാം തരത്തിൽ മറുപടി നൽകി അദ്ദേഹം ഒഴിഞ്ഞുമാറുകയായിരുന്നു.

അതേസമയം കഴിഞ്ഞ ദിവസം രാത്രി 11 മണിയോടെ ശാസ്തമംഗലത്തായിരുന്നു മാധവ് സുരേഷും കോൺഗ്രസ് നേതാവ് വിനോദ് കൃഷ്ണയും തമ്മിൽ നടുറോഡിൽ വാക്കുതർക്കമുണ്ടായത്. വിനോദ് കൃഷ്ണയുടെ വാഹനത്തിന് മുന്നിൽ കയറി മാധവ് ബഹളം വെക്കുകയും ബോണറ്റിൽ അടിക്കുകയും ചെയ്യുന്ന വീഡിയോ പുറത്തുവന്നിരുന്നു. തന്റെ വാഹനത്തിൽ അടിച്ച് പോയതുകൊണ്ടാണ് വിനോദിന്റെ വണ്ടി തടഞ്ഞതെന്നാണ് മാധവ് പറയുന്നത്. നടുറോഡിലെ തർക്കം നീണ്ടതോടെ വിനോദ് കൃഷ്ണ പോലീസിനെ വിളിച്ചു. തുടർന്ന് മ്യൂസിയം പോലീസ് സ്ഥലത്തെത്തി മാധവിനെ സ്റ്റേഷനിലേക്ക് കൊണ്ടുപോവുകയായിരുന്നു.

ബ്രെത്ത് അനലൈസർ ഉപയോഗിച്ച് നടത്തിയ പരിശോധനയിൽ മാധവ് മദ്യപിച്ചിട്ടില്ലെന്ന് പോലീസ് കണ്ടെത്തി. പിന്നാലെ മാധവിന്റെ ബന്ധുക്കളും സ്ഥലത്തെത്തി. പോലീസ് സ്റ്റേഷനിൽ വെച്ച് സംസാരിച്ച്, ഇരുവർക്കും പരാതിയില്ലെന്ന് അറിയിച്ചതോടെ കേസെടുക്കാതെ വിട്ടയക്കുകയായിരുന്നു.
മാധവിനെ തിരിച്ചറിഞ്ഞപ്പോൾ വഴിയിൽ കിടന്ന് പ്രശ്നമുണ്ടാക്കി നാണക്കേടാക്കരുതെന്ന് താൻ ആവശ്യപ്പെട്ടെങ്കിലും കേൾക്കാൻ കൂട്ടാക്കാതെ അസഭ്യം പറയുകയായിരുന്നുവെന്ന് വിനോദ് കൃഷ്ണ പറഞ്ഞു. എന്നാൽ പിന്നീട് സ്റ്റേഷനിലെത്തിയപ്പോൾ മാധവ് ഖേദം പ്രകടിപ്പിച്ചു. ഇതിനെ തുടർന്നാണ് പരാതി നൽകേണ്ടെന്ന് തീരുമാനിച്ചതെന്നും വിനോദ് കൂട്ടിച്ചേർത്തു.