മുസ്ലിം പെൺകുട്ടികളെ വിവാഹം കഴിക്കുന്ന ഹിന്ദു യുവാക്കൾക്ക് 5 ലക്ഷം രൂപ പാരിതോഷികം നൽകാമെന്ന വിവാദ പ്രഖ്യാപനവുമായി ബിജെപി എംഎൽഎ. ബിജാപൂർ സിറ്റി എംഎൽഎ ആയ ബസനഗൗഡ പാട്ടീൽ ആണ് പ്രഖ്യാപനം നടത്തിയിരിക്കുന്നത്.

കർണാടകയിലെ കൊപ്പാളിൽ മുസ്ലിം യുവതിയെ പ്രണയിച്ച യുവാവിനെ ആളുകൾ സംഘം ചേർന്ന് കൊലപ്പെടുത്തിയ സംഭവത്തിന്റെ പശ്ചാത്തലത്തിലാണ് എംഎൽഎയുടെ പരാമർശം.

വെറുതെ പറയുന്നതല്ല ഇക്കാര്യം എന്നും, വലിയ തോതിൽ ഈ ആശയം പ്രചരിപ്പിക്കാനുള്ള നീക്കങ്ങൾ താൻ സജീവമാക്കുകയാണെന്നും എംഎൽഎ വ്യക്തമാക്കി.

ബസനഗൗഡ പാട്ടീലിന്റെ പ്രസ്താവന ഇതിനോടകം തന്നെ വലിയ വിവാദമായി മാറിയിരിക്കുകയാണ്. മുസ്ലീം യുവതിയെ പ്രണയിച്ചതിന്റെ പേരിൽ വാല്മീകി വിഭാഗത്തിൽ ഉൾപ്പെട്ട ഗവിസിദ്ധപ്പ നായിക്കാണ് (26) കൊല്ലപ്പെട്ടത്.

ആഗസ്റ്റ് മൂന്നിന് മുസ്ലീം പള്ളിയുടെ മുന്നില്‍ വച്ചാണ് ഒരു സംഘം ആളുകൾ യുവാവിനെ കൊലപ്പെടുത്തിയത്. കേസിലെ പ്രധാന പ്രതി സാദിഖ് ഹുസൈൻ കൊലപാതകത്തിനുശേഷം പൊലീസിൽ കീഴടങ്ങിയിരുന്നു. മറ്റ് മൂന്ന് പ്രതികളെ പിന്നീട് അറസ്റ്റുചെയ്തു.