വർഗീയതയ്ക്കെതിരായ സമസ്തയുടെ നിലപാടുകൾക്ക് നിലവിലെ സാമൂഹ്യ സാഹചര്യത്തിൽ വലിയ പ്രസക്തിയുണ്ടെന്ന് മുഖ്യമന്ത്രി പിണറായി വിജയൻ. കാസർകോട് നടന്ന സമസ്തയുടെ നൂറാം വാർഷിക സമ്മേളന സമാപന ചടങ്ങിൽ സംസാരിക്കുകയായിരുന്നു അദ്ദേഹം. കേന്ദ്ര സർക്കാർ ഇന്ത്യയുടെ വൈവിധ്യങ്ങളെ തകർക്കാൻ ശ്രമിക്കുകയാണെന്നും ഇതിനെ ഒരുമിച്ച് നിന്ന് ചെറുക്കണമെന്നും അദ്ദേഹം പറഞ്ഞു. ഭീകരവാദത്തിനും തീവ്രവാദത്തിനുമെതിരെ വിട്ടുവീഴ്ചയില്ലാതെ നിലകൊണ്ട സംഘടനയാണ് സമസ്തയെന്നും വിശ്വാസപരമായ കാര്യങ്ങളിൽ പോലും പ്രകോപനരഹിതമായി ഇടപെട്ടുകൊണ്ട് മതനിരപേക്ഷ സംസ്കാരത്തെ ശക്തിപ്പെടുത്താൻ അവർക്ക് കഴിഞ്ഞെന്നും മുഖ്യമന്ത്രി കൂട്ടിച്ചേർത്തു. നൂറാം വാർഷികം ആഘോഷിക്കുമ്പോൾ സംഘടനയ്ക്ക് ഇതിൽ അഭിമാനിക്കാമെന്നും വർഗീയതയെ നേരിടാൻ മതനിരപേക്ഷ ശക്തികൾക്കൊപ്പം നിൽക്കണമെന്ന നിലപാട് സ്വാഗതാർഹമാണെന്നും അദ്ദേഹം വ്യക്തമാക്കി.
അതേസമയം, ചടങ്ങിൽ സുന്നി ഐക്യത്തിനായുള്ള ആഹ്വാനവുമായി സമസ്ത അധ്യക്ഷൻ ജിഫ്രി മുത്തുകോയ തങ്ങൾ രംഗത്തെത്തി. സമസ്ത വിട്ടുപോയവർ പ്രശ്നങ്ങൾ പരിഹരിച്ച് മാതൃസംഘടനയിലേക്ക് തിരികെ വരണമെന്നും കാന്തപുരം വിഭാഗത്തെ പേരെടുത്ത് പറയാതെ അദ്ദേഹം സ്വാഗതം ചെയ്തു. സി.ഐ.സി (CIC) യുമായുള്ള തർക്കങ്ങൾ പരിഹരിക്കപ്പെടാനുള്ള സാധ്യതകളും അദ്ദേഹം പ്രസംഗത്തിൽ സൂചിപ്പിച്ചു. സമസ്തയെ ആരും നിസ്സാരമായി കാണരുതെന്നും ആരെയും അകറ്റിനിർത്തിയിട്ടില്ലെന്നും വ്യക്തമാക്കിയ തങ്ങൾ, ഭിന്നിച്ചു നിൽക്കുന്നവർ മടങ്ങിവരണമെന്നും ആവശ്യപ്പെട്ടു.