തിരുവല്ലയിൽ ഗുണ്ടാ പിരിവ് നൽകാത്തതിനെത്തുടർന്ന് സ്പാ നടത്തിപ്പുകാരിയെ ലൈംഗികമായി ഉപദ്രവിച്ച സംഭവത്തിൽ കുപ്രസിദ്ധ ഗുണ്ട 'മരണ സുബിൻ' എന്ന് വിളിക്കുന്ന സുബിൻ അലക്സാണ്ടറും കൂട്ടാളികളും പിടിയിലായി. കാപ്പ നിയമപ്രകാരം നേരത്തെ നടപടി നേരിട്ടിട്ടുള്ള സുബിനും സംഘവും ഫെബ്രുവരി ഒന്നിനാണ് തിരുവല്ലയിലെ സ്പായിൽ അതിക്രമം നടത്തിയത്. 50,000 രൂപ ഗുണ്ടാ പിരിവ് ആവശ്യപ്പെട്ട് കഴിഞ്ഞ കുറച്ചു ദിവസങ്ങളായി ഇവർ സ്പാ ഉടമയെ ഭീഷണിപ്പെടുത്തി വരികയായിരുന്നു.

പണം നൽകാൻ തയ്യാറാകാതിരുന്നതിനെത്തുടർന്ന് ഫെബ്രുവരി ഒന്നിന് ഉച്ചയോടെ സ്പായിൽ അതിക്രമിച്ചു കയറിയ സംഘം കത്തി കാട്ടി ഭീഷണിപ്പെടുത്തുകയും ജീവനക്കാരെ തടഞ്ഞുവെച്ച് വീഡിയോ ചിത്രീകരിക്കുകയും ചെയ്തു. ഇതിനിടയിലാണ് സ്പാ നടത്തിപ്പുകാരിയെ പ്രതികൾ ബലപ്രയോഗത്തിലൂടെ ലൈംഗികമായി ഉപദ്രവിക്കുകയും ചുംബിക്കുകയും ചെയ്തത്.

ഗുരുതരമായ ഈ സംഭവത്തിൽ പോലീസിന്റെ ഭാഗത്തുനിന്നും വീഴ്ചയുണ്ടായതായി ആരോപണമുയർന്നിട്ടുണ്ട്. പോലീസിന്റെ നിരീക്ഷണ വലയത്തിൽ ഉണ്ടാകേണ്ട കൊടും ക്രിമിനലുകൾ നഗരമധ്യത്തിൽ ദിവസങ്ങളോളം അതിക്രമം നടത്തിയിട്ടും നടപടിയെടുക്കാൻ വൈകിയതാണ് പ്രതിഷേധത്തിന് കാരണമായത്. ഒടുവിൽ ഇന്റലിജൻസ് വിവരത്തിന്റെ അടിസ്ഥാനത്തിൽ പോലീസ് മേധാവി നേരിട്ട് ഇടപെട്ടതോടെയാണ് ജീവനക്കാരുടെ മൊഴി രേഖപ്പെടുത്താൻ പ്രാദേശിക പോലീസ് തയ്യാറായത്. തുടർന്ന് എഫ്.ഐ.ആർ രജിസ്റ്റർ ചെയ്യുകയും പ്രതികളെ അവരുടെ വീടുകളിൽ നിന്ന് പിടികൂടുകയും ചെയ്തു.