തദ്ദേശ തിരഞ്ഞെടുപ്പ് ഫലം വന്നതിന് പിന്നാലെ കേരള കോൺഗ്രസ് (എം)-ൻ്റെ മുന്നണി മാറ്റ ചർച്ച വീണ്ടും സജീവമാകുന്നു. യു.ഡി.എഫ്. നേതാക്കൾ ജോസ് കെ. മാണിയെയും കൂട്ടരെയും സ്വാഗതം ചെയ്തതോടെയാണ് ചർച്ച സജീവമായത്. അതേസമയം, ഇടതുമുന്നണിയിൽ ഉറച്ചുനിൽക്കുമെന്ന് ജോസ് കെ. മാണി 'ട്വന്റിഫോറി'നോട് പ്രതികരിച്ചു. തദ്ദേശ തിരഞ്ഞെടുപ്പിന് മുൻപേ തന്നെ ജോസ് കെ. മാണിയെയും കൂട്ടരെയും യു.ഡി.എഫിലെത്തിക്കാനുള്ള നീക്കങ്ങൾ നടന്നിരുന്നു.

എന്നാൽ ഇതിനോട് കേരള കോൺഗ്രസ് (എം) അനുകൂലമായ നിലപാട് സ്വീകരിച്ചിരുന്നില്ല. സർക്കാറിനൊപ്പം നിൽക്കുമെന്ന് തന്നെയായിരുന്നു ജോസ് കെ. മാണിയുടെ പ്രതികരണം. എന്നാൽ തദ്ദേശ തിരഞ്ഞെടുപ്പ് ഫലം വന്നതോടെ യു.ഡി.എഫിന് മേൽക്കൈ ലഭിച്ചു. ഈ പശ്ചാത്തലത്തിൽ കേരള കോൺഗ്രസ് (എം)-നെ കൂടി കൊണ്ടുവന്ന് നിയമസഭാ തിരഞ്ഞെടുപ്പിൽ കരുത്ത് തെളിയിക്കാനാണ് യു.ഡി.എഫ്. ആലോചിക്കുന്നത്. ഇതിനോടകം പല നേതാക്കളും ജോസിനെയും കൂട്ടരെയും മുന്നണിയിലേക്ക് സ്വാഗതം ചെയ്യുകയും ചെയ്തു.