തിരുവനന്തപുരം: തിരുവനന്തപുരം മെഡിക്കൽ കോളജിൽ വിദ്യാർത്ഥികൾക്ക് നേരെ അതിക്രമം. ഡയാലിസിസ് ടെക്‌നോളജി നാലാം വർഷ വിദ്യാർത്ഥിനികൾക്ക് നേരെയാണ് അജ്ഞാതൻ്റെ അതിക്രമം ഉണ്ടായത്. നൈറ്റ് ഡ്യൂട്ടിക്കിടെ പെൺകുട്ടികളെ അജ്ഞാതൻ കടന്നുപിടിക്കാൻ ശ്രമിച്ചുവെന്നാണ് പരാതി. വിദ്യാർത്ഥികൾ മെഡിക്കൽ കോളേജ് പ്രിൻസിപ്പലിന് പരാതി നൽകി.
ഇന്നലെ രാത്രിയാണ് സംഭവം നടന്നത്. അജ്ഞാതൻ വിദ്യാർത്ഥികളുടെ വിശ്രമമുറിയിലേക്ക് അതിക്രമിച്ച് കയറിയെന്നും പെൺകുട്ടികളെ കടന്നുപിടിച്ചുവെന്നുമാണ് പരാതിയിലുള്ളത്. പരിഭ്രാന്തരായ വിദ്യാർത്ഥിനികളെ ഇയാൾ കത്രിക കൊണ്ടും കസേര കൊണ്ടും ആക്രമിക്കാൻ ശ്രമിച്ചുവെന്നും പരാതിയിൽ പറയുന്നു.
അടിയന്തര സാഹചര്യത്തിൽ സെക്യൂരിറ്റി ജീവനക്കാരിൽ നിന്ന് സഹായം ലഭിച്ചില്ലെന്നും വിദ്യാർത്ഥിനികൾ പരാതിപ്പെട്ടിട്ടുണ്ട്. ഇവർ ഏറെ നേരം ബഹളം വെച്ചതിനെ തുടർന്ന് രോഗികളുടെ കൂട്ടിരിപ്പുകാരും ആശുപത്രി ജീവനക്കാരും ഓടിയെത്തിയാണ് അക്രമിയിൽ നിന്ന് വിദ്യാർത്ഥിനികളെ രക്ഷിച്ചത്. വിശ്രമ മുറിയിൽ ഉൾപ്പെടെ പെൺകുട്ടികൾക്ക് മതിയായ സുരക്ഷ ഉറപ്പാക്കണമെന്നും പരാതിയിൽ ശക്തമായ തുടർ നടപടികൾ സ്വീകരിക്കണമെന്നുമാണ് വിദ്യാർത്ഥിനികൾ പ്രിൻസിപ്പലിനോട് ആവശ്യപ്പെട്ടിരിക്കുന്നത്.