രാഹുൽ മാങ്കൂട്ടത്തിൽ എം.എൽ.എക്കെതിരെയുള്ള ലൈംഗിക പീഡന പരാതിയിൽ പ്രതികരണവുമായി നടി റിനി ആൻ ജോർജ് രംഗത്തെത്തി. കർമ്മഫലം അനുഭവിക്കും എന്നും, അന്വേഷണ സംഘം ബന്ധപ്പെട്ടാൽ തനിക്ക് അറിയാവുന്ന കാര്യങ്ങൾ പറയുമെന്നും അവർ വ്യക്തമാക്കി. രാഹുലിനെതിരെ ഇനിയും പരാതികൾ വരുമെന്നും പലർക്കും പരാതി പറയാൻ ഭയമുള്ളതിന് കാരണം സമൂഹവും രാഷ്ട്രീയക്കാരും വേട്ടക്കാരനൊപ്പം നിൽക്കുന്നതാണെന്നും റിനി ആരോപിച്ചു. താൻ നടത്തിയ വെളിപ്പെടുത്തലിന് ശേഷം ഇയാൾക്ക് മാറ്റമുണ്ടാകുമെന്ന് കരുതിയെങ്കിലും അത് ഉണ്ടായില്ല. സത്യം വിജയിക്കും എന്നതിൻ്റെ തെളിവായാണ് ഈ പുതിയ പരാതിയെന്നും അവർ പറഞ്ഞു.

'അതിജീവിതകൾ ആരുമില്ല, ഇതൊരു കെട്ടുകഥ മാത്രമാണെന്ന്' പ്രചരിപ്പിച്ചവർക്ക് നൽകുന്ന മുന്നറിയിപ്പാണ് ഈ പരാതി. ഒരു അതിജീവിത മാത്രമല്ല, ഒരുപാട് അതിജീവിതകളുണ്ടെന്നും ബുദ്ധിമുട്ടുകൾ നേരിട്ട മറ്റ് പെൺകുട്ടികൾ മുന്നോട്ട് വരണമെന്നും റിനി ആൻ ജോർജ് ആവശ്യപ്പെട്ടു. ഇത്തരം കാര്യങ്ങൾ നിയമപരമായി നേരിടണം. പേര് പറയാതെയുള്ള തൻ്റെ വെളിപ്പെടുത്തലിന് വലിയ സൈബർ അധിക്ഷേപമാണ് ഇപ്പോഴും നേരിട്ടുകൊണ്ടിരിക്കുന്നത്. പ്രതിയും കൂടെ നിൽക്കുന്നവരും യുവതിക്ക് മേൽ നടത്തുന്ന സമ്മർദ്ദമാണ് പരാതി നൽകാൻ ഇത്രയും വൈകാൻ കാരണമെന്നും റിനി കൂട്ടിച്ചേർത്തു.