ലൈംഗികാരോപണങ്ങൾ നേരിടുന്ന രാഹുൽ മാങ്കൂട്ടത്തിൽ എംഎൽഎയെ പിന്തുണച്ച് കെ. സുധാകരൻ എംപി രംഗത്തെത്തി. രാഹുൽ മാങ്കൂട്ടത്തിൽ നിരപരാധിയാണ്, താൻ അദ്ദേഹത്തെ അവിശ്വസിക്കുന്നില്ലെന്നും രാഹുൽ കോൺഗ്രസിൽ സജീവമായി രംഗത്ത് വരണമെന്നും കെ. സുധാകരൻ പറഞ്ഞു. വെറുതെ അദ്ദേഹത്തെ അപമാനിക്കാൻ വേണ്ടി സിപിഐഎമ്മും ബിജെപിക്കാരും നടത്തുന്നൊരു ശ്രമമാണ് ഇതിന്റെ പിന്നിലുള്ളതെന്നും, ഇതിൽ ഒരുകാര്യത്തിലും സത്യാവസ്ഥയില്ലെന്നും അദ്ദേഹം വ്യക്തമാക്കി. "തീർത്തും നിരപരാധിയാണവൻ. ഞാൻ അതൊക്കെ അന്വേഷിച്ചു. വഴക്ക് പറയാൻ വേണ്ടിയാണ് അന്വേഷിച്ചത്. മറുപടിയെല്ലാം കേട്ടപ്പോൾ എനിക്ക് തെറ്റിയെന്ന് തോന്നി. അദ്ദേഹത്തെ വിളിച്ചു. സംസാരിച്ചു. നമുക്ക് അവനെ കുറിച്ച് തർക്കങ്ങളില്ല. അവന്റെ പാർട്ടി കോൺഗ്രസാണ്. കോൺഗ്രസ് അവനെ അവിശ്വസിക്കുന്നില്ല. ആര് പറഞ്ഞാലും നമുക്കത് പ്രശ്‌നമല്ല" – കെ. സുധാകരൻ പറഞ്ഞു.
തദ്ദേശ തെരഞ്ഞെടുപ്പ് സമയത്ത് യുഡിഎഫിന് തലവേദന സൃഷ്ടിച്ചിരിക്കുകയാണ് രാഹുൽ മാങ്കൂട്ടത്തിനെതിരായ ഗുരുതര ആരോപണം. സോഷ്യൽ മീഡിയയിലടക്കം ഉയരുന്ന പ്രതിഷേധങ്ങളെ പ്രതിരോധിക്കാനാകാതെ കോൺഗ്രസ് വലയുന്ന ഈ ഘട്ടത്തിലാണ് കെ. സുധാകരന്റെ പ്രതികരണം. രാഹുലിനെതിരായ ലൈംഗികാരോപണത്തിൽ മുതിർന്ന നേതാക്കളിൽ നിന്ന് പരസ്പര വിരുദ്ധമായ പ്രതികരണങ്ങളാണ് നേരത്തെ ഉണ്ടായിരുന്നത്. രാഹുലിനെ പിന്തുണച്ച് കെ. സുധാകരൻ പരസ്യമായി രംഗത്തെത്തിയതോടെ പാർട്ടിക്ക് ഉള്ളിൽ രാഹുൽ വിഷയത്തിലെ ചേരിതിരിവ് വ്യക്തമായി.