ഇന്ത്യൻ വനിതാ ക്രിക്കറ്റ് ടീം വൈസ് ക്യാപ്റ്റൻ സ്മൃതി മന്ഥനയുടെ വിവാഹം പിതാവിന് ഹൃദയാഘാതം ഉണ്ടായതിനെ തുടർന്ന് മാറ്റിവെച്ചു. ഇന്ന് മഹാരാഷ്ട്രയിലെ സാംഗ്ലിയിൽ വെച്ച് നടക്കേണ്ടിയിരുന്ന വിവാഹ ചടങ്ങുകൾക്കിടെ ഇന്ന് രാവിലെയാണ് സ്മൃതിയുടെ പിതാവ് ശ്രീനിവാസ് മന്ഥനയ്ക്ക് ഹൃദയാഘാതം സംഭവിച്ചത്. പ്രഭാത ഭക്ഷണം കഴിക്കുന്നതിനിടെയാണ് അദ്ദേഹത്തിന് ആരോഗ്യപ്രശ്‌നങ്ങൾ അനുഭവപ്പെട്ടു തുടങ്ങിയതെന്നും, ആരോഗ്യനില വഷളായതിനെ തുടർന്ന് ഉടൻതന്നെ ആശുപത്രിയിൽ പ്രവേശിപ്പിക്കുകയായിരുന്നു എന്നും സ്മൃതിയുടെ മാനേജർ ഒരു ദേശീയ മാധ്യമത്തോട് പറഞ്ഞു. നിലവിൽ ശ്രീനിവാസ് മന്ഥന അപകടനില തരണം ചെയ്‌തെങ്കിലും നിരീക്ഷണത്തിൽ തുടരുകയാണ്.
പിതാവിനോടുള്ള സ്മൃതിയുടെ അടുപ്പം കണക്കിലെടുത്ത്, അദ്ദേഹം പൂർണ്ണമായി സുഖം പ്രാപിച്ച ശേഷം മതി വിവാഹം എന്ന് സ്മൃതി തീരുമാനിക്കുകയായിരുന്നു. ഡോക്ടർമാർ ആശുപത്രിയിൽ തുടരാനാണ് നിർദ്ദേശിച്ചിരിക്കുന്നത്. കൂടുതൽ ടെസ്റ്റുകൾ നടത്തുമെന്നും, ഈ അപ്രതീക്ഷിത സംഭവത്തിൽ എല്ലാവരും ഞെട്ടലിലാണെന്നും എന്നാൽ അദ്ദേഹം വേഗം സുഖം പ്രാപിക്കുമെന്നാണ് കരുതുന്നതെന്നും മാനേജർ വ്യക്തമാക്കി. സംവിധായകനും ഗായകനുമായ പലാഷ് മുഛലും സ്മൃതിയും തമ്മിലുള്ള വിവാഹമാണ് മാറ്റിവെച്ചത്. ദീർഘനാളത്തെ പ്രണയത്തിന് ശേഷമാണ് ഇരുവരും വിവാഹിതരാകാൻ തീരുമാനിച്ചത്. ഇന്ത്യൻ ലോകകപ്പ് വിജയത്തിനുശേഷം നവി മുംബൈ സ്റ്റേഡിയത്തിൽ വെച്ച് പലാഷ് മോതിരം കൈമാറിയതും മെഹന്തി ചടങ്ങിന്റെ ദൃശ്യങ്ങളുമെല്ലാം കഴിഞ്ഞ ദിവസങ്ങളിൽ സമൂഹമാധ്യമങ്ങളിൽ ശ്രദ്ധ നേടിയിരുന്നു.