ദുബായ് എയർഷോയ്ക്കിടെ ഇന്ത്യൻ വ്യോമസേനയുടെ (IAF) തേജസ് യുദ്ധവിമാനം തകർന്നുവീണ് പൈലറ്റിന് വീരമൃത്യു. വെള്ളിയാഴ്ച ഉച്ചയ്ക്ക് എയറോബാറ്റിക് പ്രദർശനത്തിനിടെയാണ് രാജ്യത്തിന്റെ തദ്ദേശീയമായി നിർമ്മിച്ച ലൈറ്റ് കോംബാറ്റ് എയർക്രാഫ്റ്റ് (LCA) തകർന്നുവീണത്. അപകടത്തിൽ പൈലറ്റിന് ജീവൻ നഷ്ടപ്പെട്ടതായി ഇന്ത്യൻ വ്യോമസേന ഔദ്യോഗികമായി സ്ഥിരീകരിച്ചു.

ദുബായ് എയർ ഷോ നടക്കുന്ന അൽ മക്തൂം അന്താരാഷ്ട്ര വിമാനത്താവളത്തിൽ പ്രാദേശിക സമയം ഉച്ചയ്ക്ക് 2:10 ഓടെയാണ് സംഭവം. ഒരു അഭ്യാസ പ്രകടനം നടത്തുന്നതിനിടെ വിമാനം നിയന്ത്രണം വിട്ട് നിലത്തേക്ക് ഇടിച്ചിറങ്ങി തീഗോളമായി മാറുകയായിരുന്നു. കാഴ്ചക്കാരായിരുന്ന നിരവധി പേർ സംഭവത്തിന്റെ ദൃശ്യങ്ങൾ പകർത്തി സമൂഹ മാധ്യമങ്ങളിൽ പങ്കുവെച്ചിട്ടുണ്ട്.

"ദുബായ് എയർ ഷോയിൽ എയറോബാറ്റിക് പ്രദർശനം നടത്തുന്നതിനിടെ ഒരു IAF തേജസ് വിമാനത്തിന് അപകടം സംഭവിച്ചു. ഈ അപകടത്തിൽ പൈലറ്റിന് ജീവൻ നഷ്ടപ്പെട്ടു. ദുരിതത്തിലായ കുടുംബത്തിന് ഈ ദുഃഖസമയത്ത് IAF അഗാധമായ ഖേദം പ്രകടിപ്പിക്കുകയും അവരോടൊപ്പം ഉറച്ചുനിൽക്കുകയും ചെയ്യുന്നു. അപകട കാരണം കണ്ടെത്താൻ ഒരു കോർട്ട് ഓഫ് എൻക്വയറിക്ക് ഉത്തരവിട്ടിട്ടുണ്ട്," ഇന്ത്യൻ വ്യോമസേന X-ൽ (മുമ്പ് ട്വിറ്റർ) പുറത്തിറക്കിയ പ്രസ്താവനയിൽ അറിയിച്ചു.

ദുബായ് മീഡിയ ഓഫീസും അപകടം സ്ഥിരീകരിച്ചിട്ടുണ്ട്. രക്ഷാപ്രവർത്തനത്തിനായി അഗ്നിശമന സേനയും അടിയന്തര വിഭാഗവും ഉടൻ സ്ഥലത്തെത്തി നടപടികൾ സ്വീകരിച്ചു. ലോകത്തിലെ ഏറ്റവും വലിയ ഏവിയേഷൻ എക്സിബിഷനുകളിൽ ഒന്നായ ദുബായ് എയർ ഷോ നവംബർ 17 ന് ആരംഭിച്ച് നവംബർ 24 വരെയാണ് നടക്കുന്നത്. ഇന്ത്യയുടെ തദ്ദേശീയ പ്രതിരോധ വ്യോമയാന ശേഷി പ്രദർശിപ്പിക്കുന്നതിനായി തേജസ് ജെറ്റ് എയർ ഷോയിൽ പങ്കെടുക്കുന്നുണ്ടായിരുന്നു.

ഈ ദുരന്തം തേജസ് യുദ്ധവിമാനം ഉൾപ്പെട്ട രണ്ടാമത്തെ അപകടമാണ്. കഴിഞ്ഞ വർഷം ജയ്‌സാൽമീറിൽ പരിശീലന പറക്കലിനിടെ തേജസ് വിമാനം തകർന്നിരുന്നുവെങ്കിലും പൈലറ്റ് സുരക്ഷിതമായി പുറത്തുവന്നു.