തിരുവനന്തപുരം: കോർപ്പറേഷനിലെ മുട്ടട വാർഡിലെ യുഡിഎഫ് സ്ഥാനാർഥി വൈഷ്ണ സുരേഷിൻ്റെ പേര് വോട്ടർപട്ടികയിൽ നിന്ന് നീക്കം ചെയ്യാൻ ഉദ്യോഗസ്ഥർക്ക് മേൽ സമ്മർദ്ദം ചെലുത്തിയത് മേയർ ആര്യ രാജേന്ദ്രനാണെന്ന് കെ. മുരളീധരൻ. നവംബർ പതിമൂന്നാം തീയതി കോർപ്പറേഷനിൽ നേരിട്ടെത്തിയാണ് ആര്യ ഇടപെടൽ നടത്തിയതെന്നും കൃത്യമായ വിവരം നേരത്തെ തന്നെ തങ്ങൾക്ക് ലഭിച്ചിരുന്നുവെന്നും, അദ്ദേഹം ആരോപിച്ചു. ആര്യയുടെ സമ്മർദ്ദത്തിന് വഴങ്ങി നിയമവിരുദ്ധമായി പേര് വെട്ടിയ ഉദ്യോഗസ്ഥർക്കെതിരെ നിയമ നടപടി തുടരുമെന്നും മുരളീധരൻ വ്യക്തമാക്കി.

ഇന്നലെയാണ് വൈഷ്ണയുടെ പേര് തിരഞ്ഞെടുപ്പ് കമ്മിഷൻ തിരികെ പട്ടികയിൽ ഉൾപ്പെടുത്തി ഉത്തരവിറക്കിയത്. കൂട്ടിച്ചേർക്കൽ പട്ടികയിലെ 1100-ാം സീരിയൽ നമ്പറായാണ് വൈഷ്ണയുടെ വോട്ട് ചേർത്തത്. വൈഷ്ണയുടെ പേര് നീക്കം ചെയ്ത കോർപ്പറേഷൻ ഇആർഒയുടെ നടപടിയിൽ ദുരൂഹതയുണ്ടെന്ന് കമ്മിഷൻ വ്യക്തമാക്കിയിരുന്നു. വൈഷ്ണ നൽകിയ രേഖകൾ ഉദ്യോഗസ്ഥൻ പരിശോധിച്ചില്ലെന്നും ഗുരുതരമായ കൃത്യവിലോപം നടന്നുവെന്നും കമ്മിഷൻ കണ്ടെത്തുകയുണ്ടായി. ഹൈക്കോടതിയുടെ നിർദേശപ്രകാരം നടത്തിയ ഹിയറിങ്ങിൽ പരാതിക്കാരനായ സിപിഎം നേതാവ് ഹാജരായിരുന്നില്ല.