പാലത്തായിയിൽ നാലാം ക്ലാസുകാരിയെ പീഡിപ്പിച്ച കേസിൽ ബിജെപി നേതാവും അധ്യാപകനുമായ കെ. പത്മരാജന് മരണം വരെ ജീവപര്യന്തം തടവും പിഴയും. തലശ്ശേരി അതിവേഗ പോക്സോ കോടതിയാണ് ശിക്ഷാവിധി പ്രഖ്യാപിച്ചത്. പോക്സോ കുറ്റങ്ങളിൽ 20 വർഷം വീതം 40 വർഷം തടവും ഒരു ലക്ഷം രൂപ പിഴയും പ്രതി അനുഭവിക്കണം. പ്രതിയായ കെ. പത്മരാജൻ ആദ്യം പോക്സോ കുറ്റത്തിലെ തടവാണ് അനുഭവിക്കേണ്ടതെന്നും, ഇത് ഏറെ സന്തോഷകരമായ വിധിയാണെന്നും പബ്ലിക് പ്രോസിക്യൂട്ടർ അറിയിച്ചു. പ്രതിഭാഗത്തിന്റെ 'കെട്ടിച്ചമച്ച കേസ്' എന്ന വാദത്തിൽ കഴമ്പില്ലെന്ന് കോടതി കണ്ടെത്തി.

ആദ്യഘട്ടത്തിൽ പോലീസ് അന്വേഷണത്തിൽ നിരാശയുണ്ടായെന്നും പബ്ലിക് പ്രോസിക്യൂട്ടർ ഭാസുരി അഭിപ്രായപ്പെട്ടു. 2020 ജനുവരി 15നും ഫെബ്രുവരി രണ്ടിനുമിടയിൽ സ്കൂളിലെ ബാത്ത്റൂമിൽ വെച്ച് പ്രായപൂർത്തിയാകാത്ത പെൺകുട്ടിയെ പീഡിപ്പിച്ചുവെന്നതാണ് കേസ്. രാഷ്ട്രീയ വിവാദം കൂടിയായ ഈ കേസിൽ, പരാതി വ്യാജമാണെന്നും എസ്ഡിപിഐ ഗൂഢാലോചനയാണെന്നും ബിജെപി ആരോപിച്ചിരുന്നു.

കേസിൽ അഞ്ചുതവണ അന്വേഷണസംഘത്തെ മാറ്റിയതും, കുട്ടിയുടെ മൊഴിയും മെഡിക്കൽ സർട്ടിഫിക്കറ്റുമുണ്ടായിട്ടും ബിജെപി നേതാവായ പ്രതിക്കെതിരെ പോലീസ് പോക്സോ വകുപ്പ് ഒഴിവാക്കി കുറ്റപത്രം നൽകിയതും വലിയ വിവാദമായിരുന്നു. കേസിൽ പ്രതിയെ രക്ഷിക്കാൻ സംസ്ഥാന സർക്കാരും ബിജെപിയും ഒത്തുകളിക്കുന്നു എന്ന് മുസ്ലിംലീഗും കോൺഗ്രസും അന്ന് പ്രചാരണം നടത്തിയിരുന്നു.