തിരുവനന്തപുരം: തിരുവനന്തപുരം കോർപ്പറേഷൻ മേയർ ആര്യ രാജേന്ദ്രൻ തന്റെ രാഷ്ട്രീയ പ്രവർത്തന കേന്ദ്രം കോഴിക്കോട് ജില്ലയിലേക്ക് മാറ്റാൻ താൽപര്യം പ്രകടിപ്പിച്ചതായുള്ള റിപ്പോർട്ടുകൾക്ക് പിന്നാലെ കോൺഗ്രസ് നേതാവ് കെ. മുരളീധരൻ എം.പി. പരിഹാസവുമായി രംഗത്ത്. "മേയര്‍ ആര്യാ രാജേന്ദ്രന്‍ കുറ്റിയും പറിച്ച് ഇനി കോഴിക്കോട്ടേക്ക്" എന്നാണ് കെ. മുരളീധരൻ പരിഹാസരൂപേണ പ്രതികരിച്ചത്.
തിരുവനന്തപുരം കോർപ്പറേഷനിലെ മേയർ പദവി ഒഴിയുന്ന സാഹചര്യത്തിൽ ആര്യ രാജേന്ദ്രൻ താമസവും രാഷ്ട്രീയ പ്രവർത്തനവും കോഴിക്കോട്ടേക്ക് മാറ്റാൻ പാർട്ടി നേതൃത്വത്തിന്റെ അനുമതി തേടിയെന്ന വാർത്തകളാണ് പുറത്തുവരുന്നത്. ബാലുശ്ശേരി എം.എൽ.എ. കെ.എം. സച്ചിൻദേവാണ് ആര്യയുടെ ജീവിതപങ്കാളി. നിലവിൽ സച്ചിൻദേവ് കോഴിക്കോട്ടും മേയറുടെ ചുമതലകളുള്ള ആര്യ തിരുവനന്തപുരത്തുമാണ്. ഈ സാഹചര്യത്തിൽ കുടുംബജീവിതവും രാഷ്ട്രീയ ചുമതലകളും ഒരുമിച്ച് കൊണ്ടുപോകുന്നതിനാണ് കോഴിക്കോട്ടേക്ക് മാറാൻ താൽപര്യപ്പെടുന്നതെന്നാണ് റിപ്പോർട്ട്. സി.പി.എം. നേതൃത്വം ഇക്കാര്യം സജീവമായി പരിഗണിക്കുന്നുണ്ടെന്നും സൂചനയുണ്ട്.
നേരത്തെയും കെ. മുരളീധരൻ മേയർ ആര്യ രാജേന്ദ്രനെതിരെ വിവാദ പരാമർശങ്ങൾ നടത്തിയിരുന്നു. മേയറെ കാണാൻ സൗന്ദര്യമുണ്ടെങ്കിലും വായിൽ നിന്ന് വരുന്നത് 'കൊടുങ്ങല്ലൂർ ഭരണിപ്പാട്ടിനേക്കാൾ ഭയാനകമായ ചില വർ‍ത്തമാനങ്ങളാണെ'ന്നായിരുന്നു മുരളീധരൻ്റെ മുൻപരാമർശം. ഇത് വലിയ വിവാദങ്ങൾക്ക് വഴിവെക്കുകയും മേയർ പോലീസിൽ പരാതി നൽകുകയും ചെയ്തിരുന്നു.
നിലവിൽ സി.പി.എം. ജില്ലാ കമ്മിറ്റിയംഗവും ഡി.വൈ.എഫ്.ഐ. സംസ്ഥാന സെക്രട്ടേറിയറ്റ് അംഗവുമാണ് ആര്യ രാജേന്ദ്രൻ. മേയറായിരുന്നവരെ ഡെപ്യൂട്ടി മേയറാക്കാൻ മത്സരിപ്പിക്കില്ലെന്നും നിയമസഭയിലേക്കോ പാർലമെന്റിലേക്കോ ആണ് പരിഗണിക്കുകയെന്നുമുള്ള സി.പി.എം. സംസ്ഥാന സെക്രട്ടറി എം.വി. ഗോവിന്ദന്റെ മുൻ പ്രസ്താവന ആര്യയുടെ കോഴിക്കോട്ടേക്കുള്ള മാറ്റവും ഭാവി രാഷ്ട്രീയ ഭാവിയും സംബന്ധിച്ച സൂചനയായി വിലയിരുത്തപ്പെടുന്നു.